وزیر اعلی شیوراج نے ناریل پانی پی کر توڑی بھوک ہڑتال ، کہا: مندسور تشدد کے مجرم بخشے نہیں جائیں گے

Jun 11, 2017 01:31 PM IST | Updated on: Jun 11, 2017 03:47 PM IST

بھوپال: مدھیہ پردیش میں بحالی امن کے مقصد سے وزیر اعلی شیوراج سنگھ چوہان نے کل سے شروع کی گئی غیر معینہ بھوک ہڑتال آج ختم کردی ہے ۔ انہوں نے ناریل پانی پی کر اپنی بھوک ہڑتال ختم کی ۔ بھوک ہڑتال ختم کرنے سے قبل وزیر اعلی شیوراج نے کہا کہ مندسور تشدد کی اعلی سطحی جانچ کی جائے گی اور اس کے قصورواروں کو چھوڑا نہیں جائے گا۔ وزیر اعلی نے اس بات پر اطمینان کا اظہار کیا کہ ان کی بھوک ہڑتال کے دوران ریاست میں کہیں بھی تشدد نہیں ہوا۔ سابق وزیر اعلی کیلاش جوشی نے شیوراج کی بھوک ہڑتال ختم کروائی۔

خیال رہے کہ گزشتہ روز مندسور میں فائرنگ میں مرنے والے کسانوں کے لواحقین نے وزیر اعلی مسٹر چوہان سے ملاقات کی تھی بھوک ہڑتال ختم کرنے کی اپیل کی تھی ۔ مرنے والے کسانوں کے لواحقین نے بھوک ہڑتال کے مقام بھوپال کے دسہرہ میدان پر ان سے ملاقات کرنے کے بعد ان سے بھوک ہڑتال ختم کرنے کی جذباتی اپیل کی تھی۔

وزیر اعلی شیوراج نے ناریل پانی پی کر توڑی بھوک ہڑتال ، کہا: مندسور تشدد کے مجرم بخشے نہیں جائیں گے

اس کے قبل دارالحکومت میں ہفتہ اور اتوار کی درمیانی رات تیز بارش کی وجہ سے بھوک ہڑتال کے مقام پر بدنظمی پیدا ہوگئی تھی۔ اگرچہ انتظامیہ نے بارش کے خدشہ کے پیش نظر یہاں واٹر پروف پنڈال لگایا تھا، لیکن اس کے بعد بھی کئی جگہ کیچڑ اور پانی بھرنے جیسے حالات پیدا ہو گئے۔ دسہرہ میدان کے آس پاس صبح سے ریاست کے کسانوں کی گاڑیوں کی بھیڑ لگ گئی تھی۔ کسان بسوں اور پرائیویٹ گاڑیوں سے دارالحکومت بھوپال میں واقع بھوک ہڑتال کے مقام تک پہنچ رہے ہیں۔

مندسور میں حالات قابو میں ، کرفیو مکمل طور ہٹا لیا گیا

دریں اثنا مدھیہ پردیش کے مندسور میں کئی دنوں کی بدامنی کے بعد حالات اب تقریبا کنٹرول میں ہونے کی وجہ سے کرفیو مکمل طور ہٹا لیا گیا ہے۔ مندسور پولیس سپرنٹنڈنٹ منوج کمار سنگھ کے مطابق پپليامنڈي سمیت پورے مندسور سے کرفیو ہٹا لیا گیا ہے۔ حالات مکمل کنٹرول میں ہیں۔ اگرچہ اضافی سیکورٹی فورسز اب بھی احتیاطا تعینات ہیں۔ پبلک ٹرانسپورٹ بھی شروع ہو گیا ہے۔

مندسور میں کئی دنوں بعد پورے دن کھلا ہے بازار

مندسور میں گزشتہ رات کرفیو ختم ہونے کی وجہ سے آج کئی دن بعد بازارپورے دن کھلارہے گا۔ دوسری طرف ریاست کے مندسور، نیمچ، رتلام اور اجین میں کئی دن سے بند انٹر نیٹ خدمات کو بھی بحال کر دیا گیا ہے۔ انتظامیہ نے افواہوں کو روکنے کے لئے نیٹ پر پابندی لگا دی تھی۔

دیگر اضلاع میں بھی قیام امن کی اطلاع

موصولہ خبروں کے مطابق دارالحکومت بھوپال سمیت اندور، نیمچ، دھار،راج گڑھ، رتلام، شاجاپور، دیواس، سيهور اور آگر-مالوا سمیت دیگر اضلاع سے بھی امن و امان کے قیام کی اطلاع ہے۔ گزشتہ دس دنوں کے دوران ریاست کے مغربی حصے کے ان اضلاع میں کسان تحریک کے دوران تشدد، آگ زنی، پتھراؤ اور توڑپھوڑ کی درجنوں وارداتیں درج کی گئی ہیں۔

شرپسند عناصر کی شناخت کی کوششیں جاری

سرکاری ذرائع کا کہنا ہے کہ پولیس انتظامیہ بھی شرپسند عناصر کی شناخت کر رہی ہے اور ان کے خلاف قانونی کارروائی کی جا رہی ہے۔ افراتفری پھیلانے والے عناصر سے بھی سختی سے نمٹنے کے لئے کہا گیا ہے۔ اس کے علاوہ خفیہ نظام کو بھی زیادہ سرگرمی کے ساتھ کام کرنے کے لئے کہا گیا ہے۔

متعلقہ اسٹوریز

ری کمنڈیڈ اسٹوریز