گوا کانگریس کے نومنتخب رکن اسمبلی وشوجیت رانے کا راہل گاندھی کو کھلا خط

Mar 16, 2017 11:33 AM IST | Updated on: Mar 16, 2017 11:33 AM IST

پنجی۔  گوا کانگریس کے سینئر لیڈر وشوجیت رانے نے پارٹی کے نائب صدر راہل گاندھی کو خط لکھ کر مطالبہ کیا ہے کہ ریاست میں پارٹی کے جن لوگوں نے حکومت بنانے میں صحیح طریقے سے کام نہیں کیا، ان کے خلاف کارروائی ہو۔ نو منتخب ممبر اسمبلی مسٹر رانے نے  نامہ نگاروں سے کہا کہ کانگریس کی قانون ساز پارٹی کا لیڈر منتخب کرنے میں دو دن کا وقت لگا دیا گیا۔ یہ گوا کے انچارج پارٹی لیڈر کی بدانتظامی کے سبب ہوا تھا۔ سپریم کورٹ نے بھی یہی بات کہی ہے۔ انچارج لیڈر تجربہ کار شخص ہیں لیکن اتنے تجربہ کار شخص کو بھی معلوم نہیں کہ کیا کرنا ہے اور حکومت بنانے کے لئے کیا قدم اٹھانا ہے۔ انہوں نے کہا کہ بھارتیہ جنتا پارٹی (بی جے پی) کے سینئر لیڈر منوہر پاریکر دہلی سے آئے اور انہوں نے متعلقہ لوگوں سے بات کر کے آٹھ دیگر ارکان کو اپنے حق میں کر لیا اور ریاست میں بی جے پی اتحاد کی حکومت بنا لی۔

انہوں نے خط میں لکھا ہے کہ یہ مکمل طور پر کانگریس کی بدانتظامی ہی تھی۔ کانگریس لیڈروں کے رویے سے ایسا لگ رہا تھا جیسے وہ حکومت بنانا ہی نہیں چاہتے۔ انہوں نے کہا کہ وہ مسٹر گاندھی سے ملاقات کرنا چاہتے ہیں اور ان سے مل کر بات کرنے کے بعد کانگریس میں رہنے یا نہ رہنے کا فیصلہ کریں گے۔ کانگریس کے ایم ایل اے نے کہا کہ انہیں امید ہے کہ مسٹر راہل گاندھی ان کے خط کے سلسلے میں ضرور قدم اٹھائیں گے اور اگر مسٹر راہل گاندھی سے کوئی جواب نہیں ملا تو وہ سمجھیں گے کہ وہ پارٹی کے لئے فٹ نہیں ہیں۔ اس کے بعد وہ اپنے رکن اسمبلی ساتھیوں اور عوام کے ساتھ مل کر اگلے قدم کا فیصلہ کریں گے۔ مسٹر رانے نے کہا کہ انہیں یقین ہے کہ مسٹر راہل گاندھی ان کے خط کا جواب دیں گے۔ انہوں نے کہا کہ دیکھتے ہیں اگلے دو دن میں کیا ہوتا ہے۔ انہوں نے کہا کہ گوا اسمبلی الیکشن میں کانگریس 17 سیٹیں جیت کر سب سے بڑی پارٹی بن کر ابھری تھی لیکن پارٹی حکومت بنانے کے لئے 21 سیٹوں پر جیت درج نہیں کر سکی جبکہ دوسری طرف بھارتیہ جنتا پارٹی صرف 13 نشستیں جیتنے کے باوجود انتخابات کے بعد علاقائی پارٹیوں گوا فارورڈ پارٹی اور مهاراشٹروادي گومانتك پارٹی کے ساتھ مل کر سابق وزیر دفاع منوہر پاریکر کی قیادت میں حکومت بنانے کا دعوی پیش کر دیا۔

گوا کانگریس کے نومنتخب رکن اسمبلی وشوجیت رانے کا راہل گاندھی کو کھلا خط

راہل گاندھی: فائل فوٹو

واضح رہے کہ مسٹر پاریکر نے گزشتہ روز ہی وزیر اعلی کے عہدے کا حلف لے لیا ہے اور انہیں آج  ایوان میں اکثریت ثابت کرنا ہے۔

متعلقہ اسٹوریز

ری کمنڈیڈ اسٹوریز