COVID-19 ویکسین لینے کے بعد ہریانہ کے وزیر داخلہ انل وج کو ہوا کورونا وائرس

ہریانہ کے وزیر داخلہ انل وج کورونا وائرس سے متاثر پائے گئے ہیں ۔ اس کے بارے میں انہوں نے خود ہی جانکاری دی ہے ۔ انل وج نے ٹویٹ کرکے کہا کہ میں کووڈ 19 جانچ میں کورونا پازیٹیو پایا گیا ہوں ۔ میں سول اسپتال امبالہ کینٹ میں بھرتی ہوں ۔ یہیں پر میرا علاج چل رہا ہے ۔ ساتھ ہی انہوں نے اپیل کرتے ہوئے کہا کہ وہ سبھی جو میرے رابطے میں آئے ہیں ، وہ خود کورونا جانچ کروالیں ۔

دراصل گزشتہ 20 نومبر کو دیسی ویکسین کے تیسرے مرحلہ کا پہلا ٹیکہ انل وج کو لگایا گیا تھا ۔ انہیں امبالہ کینٹ کے سول اسپتال میں یہ ٹیکہ لگایا گیا تھا ۔ پی جی آئی روہتک کی ٹیم کی نگرانی میں ہی وزیر داخلہ نے ویکسین کا ٹیکہ لگایا تھا ۔ اس کے بعد آدھے گھنٹے تک نگرانی میں رکھا گیا تھا ۔ اس سے پہلے روہتک پی جی آئی کی ٹیم نے انل وج کا نمونہ لیا تھا ۔

I have been tested Corona positive. I am admitted in Civil Hospital Ambala Cantt. All those who have come in close contact to me are advised to get themselves tested for corona.

— ANIL VIJ MINISTER HARYANA (@anilvijminister) December 5, 2020

اس وقت پی جی آئی روہتک کے وائس چانسلر نے بتایا تھا کہ کوویکیسن کے تیسرے مرحلہ کا ٹرائل جمعہ سے شروع ہوگیا ہے ۔ سب سے پہلے 200 رضاکاروں کو کورونا ویکسین کی پہلی ڈوز دی جارہی ہے ۔ بتادیں کہ ہر رضاکار کو ویکسین کی دو ڈوز دی جائے گی ۔ پہلی ڈوز دینے کے 28 دنوں کے بعد دوسری ڈوز دی جائے گی ۔ بتادیں کہ بھارت بایوٹیک ہندوستانی کمپنی ہے جو Covaxin کے نام سے کورونا کی ویکسین پر کام کررہی ہے ۔

خیال رہے کہ بھارت بایوٹیک ، آئی سی ایم آر کے ساتھ مل کر کوویکسین تیار کررہی ہے ۔ پی جی آئی روہتک ملک کے ان تین سینٹروں میں سے ایک ہے ، جہاں تیسرے مرحلہ میں 200 رضاکاروں کو کورونا ویکسین لگائی جائے گی ۔