مرکزی حج کمیٹی کے زیر انتظام چلنے والی کوچنگ سینٹر کے 4 طلبہ UPSC امتحان میں کامیاب

ممبئی : ممبئی کے حج ہاؤس میں مرکزی حج کمیٹی کے زیرِ انصرام جاری مقابلہ جاتی امتحانات کے کوچنگ سینٹر سے استفادہ حاصل کرنے والے چار امیدواروں نے یونین پبلک سروس کمیشن کے امتحان میں کامیابی حاصل کی ہے۔ یونین پبلک سروس کمیشن (UPSC) امتحان برائے 2022 میں حج ہاوس کوچنگ اینڈ گائیڈنس سینٹر سے استفادہ کرنے والے چار طلبہ برہان زماں،  محمد حسین سید، عائشہ قاضی اور تسکین خان نے کامیابی حاصل کی ہے۔  برہان زماں نے یوپی ایس سی امتحان میں آل انڈیا 768 واں رینک حاصل کیا ہے۔ جبکہ دوسرے طالبِ علم محمد حسین سید نے 750 واں رینک ، عائشہ قاضی نے 582 واں اور تسکین خان نے 736 واں رینک حاصل کیا ہے۔

برہان زماں کا تعلق کلکتہ سے ہے ۔ انہوں نے حج ہاوس میں 2019-2020 کے بیچ میں کوچنگ حاصل کی تھی ۔ محمد حسین سید کا تعلق ممبئی کے پائیدھونی علاقے سے ہے۔ انہوں نے 2019 سے 2021 تک حج ہاوس کوچنگ اینڈ گائیڈنس سیل سے استفادہ کیا تھا۔ عائشہ قاضی کا تعلق ممبئی کےمضافاتی علاقے کلوا سے ہے ۔ انہوں نے 2019 کے بیچ میں حج ہاوس سے تربیت حاصل کی تھی ۔ جبکہ میرٹھ سےتعلق رکھنے والی تسکین خان نے 2019 بیچ سے مقابلہ جاتی امتحان کی تربیت حاصل کی تھی۔

واضح رہے کہ ممبئی میں واقع مرکزی حج کمیٹی کے صدر دفتر حج ہاوس کی عمارت میں سو مسلم طلبہ طالبات کو مقابلہ جاتی امتحان کی کوچنگ دی جاتی ہے۔ پچاس طلبہ کے اخراجات کو حج کمیٹی برداشت کرتی ہے، جبکہ پچاس طلبہ کے اخراجات کو مرکزی وقف کونسل برداشت کرتی ہے۔ حج ہاوس کی عمارت میں سو طلبہ کے لئے قیام و طعام کے ساتھ مفت میں کوچنگ کا انتظام کیا جاتا ہے۔ ہرسال جون جولائی میں حج ہاوس کوچنگ سینٹر کیلئے داخلہ امتحان فارم نکلتے ہیں۔ داخلہ امتحان اور پینل انٹرویو کے بعد ایڈمیشن دیا جاتا ہے۔ حج ہاوس یو پی ایس سی کوچنگ سینٹر سے ملک کے مختلف حصوں سے تعلق رکھنے مسلم طلبہ و طالبات استفادہ کرتے ہیں ۔

مرکزی حج کمیٹی کے چیف ایگزیکٹو افسر یعقوب شیخا نے طلبہ کی کامیابی پر مسرت کا اظہار کرتے ہوئے کہاکہ ہماری کوشش ہوتی ہے کہ طلبہ و طالبات کیلئے بہترین کوچنگ اور سہولیات کا انتظام کیا جائے۔ اس قبل بھی حج ہاوس کوچنگ سینٹر سے کئی طلبہ و طالبات نے کامیابی حاصل کی اور وہ آج ملک و قوم کی خدمت انجام دے رہے ہیں۔

یہ بھی پڑھئے: یو پی ایس سی میں آل انڈیا 1 رینک والی DU کی سابق طالبہ ایشیتا کشور سے ملیے! یہ ہے کامیابی کا راز

یہ بھی پڑھئے: جھارکھنڈ بورڈ نے جاری کیا 10ویں، 12ویں کا رزلٹ، ڈائریکٹ لنک سے کریں چیک

یادرہے کہ گذشتہ سال 2021 میں حج ہاوس کوچنگ سینٹر کے تین طلبہ نے مقابلہ جاتی امتحان میں کامیابی حاصل کی تھی۔ اس سے قبل بھی حج ہاوس کوچنگ سینٹر سے استفادہ کرنے والے کئی طلبہ و طالبات نے یوپی ایس سی امتحان میں کامیابی حاصل کرملک و قوم کی خدمت انجام دے رہے ہیں ۔