سشانت کیس : این سی بی نے 9 مہینے بعد فائل کی 30 ہزار صفحات کی چارج شیٹ ، ریا سمیت 33 ملزم

بالی ووڈ اداکار سشانت سنگھ راجپوت کی موت کی جانچ میں ڈرگس کا پہلو سامنے آنے کے بعد سے نارکوٹکس کنٹرول بیورو نے جس طرح سے چھاپہ ماری کی ، اس کے بعد اب اس معاملہ سے وابستہ چارج شیٹ ممبئی کی این ڈی پی ایس کورٹ میں داخل کردی گئی ہے ۔ 30 ہزار صفحات کی اس چارج شیٹ میں سشانت سنگھ راجپوت کی گرل فرینڈ ریا چکرورتی اور ان کے بھائی شووک چکرورتی کو اہم ملزم بنایا گیا ہے ۔ یہی نہیں چارج شیٹ میں دیپیکا پڈوکون ، سارا علی خان اور شردھا کپور کے بیان کو بھی جوڑا گیا ہے ۔ چارج شیٹ میں کل 33 لوگوں کے نام ہیں ۔

نارکوٹکس کنٹرول بیورو نے 30 صفحات کی چارج شیٹ سبھی ملزمین کے پاس سے برآمد ڈرگس ، الیکٹرانک آلات ، فورینسک رپورٹ اور گواہوں کے بیانات کی بنیاد پر تیار کی ہے ۔ این سی بی نے دو ہزار سے زیادہ صفحات کی ہارڈ کاپی چارچ شیٹ داخل کی ہے جبکہ ڈیجیٹل فارمیٹ میں کئی ہزار صفحات ہیں ، جو ایک سی ڈی میں عدالت میں دائر کی گئی ہے ۔

کیس میں اب تک 33 لوگوں کی ہوئی گرفتاری

بتادیں کہ پورے معاملہ میں 38 افراد کو ملزم بنایا گیا ہے ، جس میں سے پانچ ملزمین فرار بتائے جارہے ہیں ۔ این سی بی نے ڈرگس کے اس کیس میں 33 لوگوں کو اب تک گرفتار کیا ہے ۔

ڈرگس کیس میں جن لوگوں کی گرفتاری ہوئی ہے ، ان میں ریا چکرورتی اور ان کے بھائی شووک چکرورتی کے علاوہ سشانت سنگھ راجپوت کے مینیجر سیموئل مرانڈا ، دیپیش ساونت اور کئی ڈرگ پیڈلرس شامل ہیں ۔