افغانستان کے سابق وزیر خزانہ بن گئے ہیں Uber ڈرائیور، کبھی پیش کیا تھا چھ ارب ڈالر کا بجٹ

واشنگٹن : کہتے ہیں کہ اس دنیا میں سب سے طاقتور چیز وقت ہے ۔ کسی انسان کی زندگی پر اس کے اچھے یا خراب وقت کا ہی سب سے زیادہ اثر ہوتا ہے ۔ اس کو افغانستان کے سابق وزیر خزانہ خالد پائندہ (Khalid Payenda) کے موجودہ حالات سے اچھی طرح سمجھا جاسکتا ہے ۔ کبھی افغانستان کے وزیر خزانہ کے طور پر خالد پائندہ نے ملک کی پارلیمنٹ میں چھ ارب ڈالر کا بجٹ پیش کیا تھا ، اب وہ امریکہ کی راجدھانی واشنگٹن ڈی سی میں اپنے اہل خانہ کی کفالت کرنے کیلئے ایک اوبر ڈرائیور کا کام کررہے ہیں ۔ گزشتہ سال طالبان کے ملک پر قبضہ کرنے سے ٹھیک پہلے پائندہ افغانستان چھوڑ کر امریکہ پہنچ گئے تھے ۔

واشنگٹن پوسٹ کی ایک رپورٹ کے مطابق چار بچوں کے والد خالد پائندہ نے کہا کہ اس کام نے ان کی زندگی میں بڑی تبدیلی کی ہے ۔ میں اس کیلئے بہت زیادہ شکر گزار محسوس کرتا ہوں ۔ اس کا مطلب ہے کہ مجھے مایوس ہونے کی ضرورت نہیں ہے ۔ اوبر میں ڈرائیور کا کام کرنے کے ساتھ ہی پائندہ جارج ٹاون یونیورسٹی میں پڑھاتے بھی ہیں اور کبھی کبھی تھنک ٹینک کی میٹنگوں میں تقریر بھی کرتے ہیں ۔

پائندہ کا واضح طور پر ماننا ہے کہ افغانستان پر طالبان کے قبضہ کیلئے امریکی حکومت ذمہ دار ہے ۔ غور طلب ہے کہ پچھلی دو دہائیوں کے جدوجہد کے بعد اگست 2021 میں امریکہ نے افغانستان سے اپنی فوج کو ہٹا لیا تھا ۔ طالبان کے افغانستان پر قبضہ کرنے کے مہینوں پہلے سابق امریکی صدر ڈونالڈ ٹرمپ کی سرکار نے فروری 2020 میں طالبان کے ساتھ ایک مشروط معاہدے پر دستخط کیا تھا ، جس میں اگلے 14 مہینوں میں امریکی افواج کو افغانستان سے باہر نکالنے کا وعدہ کیا گیا تھا ۔ اس سمجھوتہ میں اس وقت کی افغانستان سرکار کو شامل نہیں کیا گیا تھا ۔

زیادہ تر سینئر امریکی اہلکار افغانستان جنگ کو ختم کرنا چاہتے تھے ، جو 20 سال پہلے جمہوریت ، انسانی حقوق اور خواتین کے حقوق کے مبینہ وعدوں کے ساتھ شروع ہوئی تھی ۔