سری لنکا میں صدارتی انتخابات سے ٹھیک پہلے مسلم رائے دہندگان کی بس پر گولی باری

کولمبو۔  سری لنکا میں صدارتی انتخابات سے عین قبل یہاں کے شمال مغربی علاقے میں اقلیتی مسلم ووٹرز کو لے جا رہی بس پر نامعلوم بندوق برداروں نے حملہ کر دیا۔ پولیس نے یہ اطلاع دیتے ہوئے بتایا کہ اس حملے میں مارے گئے لوگوں کی فی الحال جانکاری نہیں مل پائی ہے۔

کولمبو سے تقریبا 240 کلومیٹر کی دوری پر واقع تنتری مالے میں ایک پولیس آفیسر نے کہا کہ حملہ آوروں نے سڑک پر ٹائر جلا کر راستہ روک دیا تھا۔ انہوں نے دوسری طرف سے آ رہے 100 بسوں کے قافلے کو گھیر کر ان پر حملہ کر دیا۔ پولیس آفیسر نے بتایا ’’ حملہ آوروں نے بسوں پر گولیوں اور پتھر سے حملہ کیا۔ انہوں نے کم سے کم دو بسوں کو نشانہ بنایا لیکن اس میں فی الحال کسی کے مارے جانے کی خبر نہیں ہے‘‘۔

پولیس نے بتایا کہ مسلمانوں کا یہ قافلہ ساحلی شہر پتلم سے ووٹ ڈالنے کے لئے پڑوس کے ضلع منار جا رہا تھا۔ ان کا نام وہیں کے ووٹر لسٹ میں درج ہے۔ حملے کی خبر ملتے ہی علاقے میں اضافی پولیس دستے کو بھیجا گیا جس نے راستے کو صاف کر کے سبھی لوگوں کو بہ حفاظت ووٹنگ مراکز تک پہنچایا۔