حجاب پہننے والی پاکستان نژاد طالبہ مس انگلینڈ کی فائنلسٹ بنی

شمالی انگلینڈ کی رہنے والی پاکستان نژاد کی ایک طالبہ مس انگلینڈ مقابلہ حسن کے فائنل میں جگہ بنانے والی ایسی پہلی حصہ دار بن گئی جو حجاب پہنتی ہے۔

سارا افتخار انگلینڈ کے مغربی یارکشائر کے علاقے میں واقع ہڈرس فیلڈ یونیورسٹی میں قانون کی طالبہ ہیں۔ انہوں نے جولائی میں مس ہڈرس فیلڈ 2018 کا خطاب جیتا تھا اور اب وہ 49 دیگر شرکاء کے ساتھ مس انگلینڈ کے تاج کے لئے مقابلہ کریں گی۔

بیس سالہ طالبہ میک اپ آرٹسٹ کے طور پر بھی کام کرتی ہیں اور سوشل میڈیا پر مقبول ہیں۔

انہوں نے کہا، "مجھے توقع نہیں تھی کہ میں تاریخ رقم کروں گی۔ مجھے فخر محسوس ہو رہا ہے۔ میں شاید (مس انگلینڈ کے فائنل میں) حجاب پہنے والی پہلی خاتون ہو جاوں۔ اگرچہ میں ایک سادہ سی لڑکی ہوں اور ہم سب کے پاس اس مقابلے میں برابر کا موقع ہو گا۔ "