پاکستان: سوات میں سی ٹی ڈی تھانہ کے اندر خودکش دھماکہ، 12 پولیس اہلکار جاں بحق، درجنوں زخمی

اسلام آباد: پاکستان سے ایک مرتبہ پھر بڑی خبر سامنے آرہی ہے ۔ پاکستان کے خیبر پختونخوا کے ضلع سوات کے کبل تھانہ کے اندر ’خود کش‘ بم دھماکے ہونے کی اطلاعات آرہی ہیں ۔ پاکستانی میڈیا رپورٹس کے مطابق اس دھماکہ میں کم از کم 12 پولیس اہلکاروں  کی موت ہوگئی ہے جب کہ 54 اہلکاروں اور  تین شہریوں سمیت 57 افراد زخمی ہو گئے۔

ڈان نیوز کی ایک خبر کے مطابق یہ خود کش دھماکہ رات 8 بج کر 20 منٹ پر تحصیل کبل کے کبل تھانہ کے اندر ہوا ۔ اس دھماکہ میں تھانے کی بلڈنگ کے علاوہ کاؤنٹر ٹیررزم ڈیپارٹمنٹ اور تھانہ کے اندر واقع مسجد کی عمارت کو نقصان پہنچان ہے ۔ پولیس کا کہنا ہے کہ منہدم عمارتوں کے نیچے 20 کے قریب پولیس اہلکار ملبے تلے دب گئے تھے جب کہ زخمیوں کو سیدو شریف ٹیچنگ اسپتال پہنچایا گیا۔

وہیں جیو نیوز کی ایک خبر کے مطابق دھماکہ کے بعد خیبر پختونخوا کے محکمہ صحت نے سوات کے اسپتالوں میں ایمرجنسی نافذ کر دی ہے اور اسپتالوں سے کہا گیا ہے کہ دھماکہ سے متاثرہ افراد کو ہنگامی بنیادوں پر علاج فراہم کیا جائے۔

یہ بھی پڑھئے: آکسفورڈ یونیورسٹی نے ملالہ یوسفزئی کو اعزازی فیلو شپ سے نوازا، والد نے کہی یہ بڑی بات

یہ بھی پڑھئے: پاکستان کی فوج کرے گی اقتدار پر قبضہ؟ سیاسی-اقتصادی حالات پر سابق وزیراعظم عباسی کا دعویٰ

وہیں دوسری طرف پاکستان کے وزیر داخلہ رانا ثنا اللہ نے سوات میں سی ٹی ڈی تھانے میں دھماکہ کی شدید الفاظ میں مذمت کرتے ہوئے قیمتی جانی نقصان پر افسوس کا اظہار کیا۔ رانا ثنا اللہ کا کہنا تھا دہشت گردی کے اس ناسور کو جلد جڑ سے اکھاڑ پھینکیں گے۔