سعودی حکمراں شاہ سلمان کا رمضان کے مقدس ماہ میں اجتماعی عبادات نہ ہونے پر اظہار افسوس ، مسلمانوں سے کی یہ خاص اپیل

سعودی عرب سمت خلیجی ممالک میں رمضان المبارک کے مقدس مہینے کا آغاز ہوچکا ہے اور وہاں جمعہ کو پہلا روزہ ہے ۔ رمضان المبارک کے بابرکت ماہ کے آغاز پر سعودی عرب کے فرمانروا شاہ سلمان نے سبھی لوگوں کو مبارکباد دی ہے اور ساتھ ہی لوگوں سے دعا کرنے کی بھی اپیل کی کہ اللہ تعالی دنیا بھر میں پھیلی مہلک وبا کو اٹھالے ۔ شاہ سلمان نے اس موقع پر اس امید کا بھی اظہار کیا کہ رمضان میں ہمارے عوام اور دنیا کی اقوام کیلئے امید اور سلامتی کی خوش خبریاں آئیں گی ۔

ٹویٹر پر اپنے پیغام میں سعودی حکمراں نے کہا کہ ہم رمضان میں اللہ کے حضور گڑگڑائیں گے کہ وہ ہم پر اور پوری دنیا پر سے ہر قسم کی آفت و بلا کو اٹھا لیں۔ خیال رہے کہ سعودی عرب میں عدالت عظمی نے اعلان کیا تھا کہ مملکت میں پہلا روزہ جمعہ کے روز ہو گا ۔

نحمد الله أن بلغنا شهر رمضان المبارك، مبتهلين إليه عز وجل أن يتقبل منا صيامه وقيامه، ومتضرعين له بالدعاء أن يرفع عنا وعن العالم كل بلاء، ونسأل الله أن يجعل هذا الشهر شهر خير وبركة، وأن تكون فيه بشارات الأمل والسلام لشعبنا وجميع شعوب العالم.

— سلمان بن عبدالعزيز (@KingSalman) April 23, 2020

قابل ذکر ہے کہ قبل ازیں جمعرات کو رمضان المبارک کی آمد کے موقع پر اپنے بیان میں شاہ سلمان نے کورونا وائرس کی وجہ سے پیدا ہونے والی مشکل صورتحال پر قابو پانے کے لیے سخت محنت پر زور دیا تھا ۔ ساتھ ہی ساتھ انہوں کورونا وائرس کی وجہ سے رمضان المبارک میں عبادات میں پیش آنے والی مشکلات پر بھی افسوس کا اظہار کیا تھا۔

شاہ سلمان کا کہنا تھا کہ ان حالات میں رمضان المبارک کی آمد باعث تکلیف ہے، حالات نے ہمیں اجتماعی عبادات ، نمازوں ، تراویح اور خدا کے گھر میں قیام اللیل سے روک دیا ہے۔ سعودی فرماںروا نے مزید کہا کہ تمام حفاظتی اقدامات انسانی جانوں کو بچانے اور وائرس میں مبتلا ہونے سے روکنے کے لیے اٹھائے گئے ہیں ۔ اس سال رمضان المبارک ایک ایسے وقت میں آئے ہیں جب ہم ان حالات میں رہ رہے ہیں کہ دنیا بھر کی انسانیت بہت شدید متاثر ہے اور وائرس کی وجہ سے ہم دنیا کی تاریخ کے ایک مشکل اور حساس دور سے گزر رہے ہیں ۔