غزہ جنگ کے بعدتقریباً2 لاکھ فلسطینیوں کو طبی امداد کی ضرورت ہے: ڈبلیوایچ او

عالمی ادارہ صحت (ڈبلیو ایچ او) نے خبردارکیا ہے کہ مقبوضہ فلسطینی علاقوں میں گذشتہ ماہ حماس اور اسرائیل کے درمیان مسلح تنازع کے بعد قریباً دو لاکھ فلسطینیوں کو مختلف النوع طبّی امداد کی ضرورت ہے۔ڈبلیو ایچ او کے مشرقی بحرمتوسط ریجن نے ایک بیان میں کہا ہے کہ عالمی ادارے نے ان فلسطینیوں کی طبی معاونت کے لیے اپنی کاوششیں تیز کردی ہیں۔بیان کے مطابق غزہ میں 77ہزار سے زیادہ افراد اپنے مکانات تباہ ہونے سے بے گھر ہوگئے ہیں۔اسرائیل کی بمباری کے نتیجے میں 30 مراکز صحت مکمل یاجزوی طور پر تباہ ہوچکے ہیں۔

WHO documented 132 attacks against health care in the occupied Palestinian territory in April and May 2021.
Health care is #NotATarget
For more information on WHO health attacks monitoring: https://t.co/3PYNtMdumT pic.twitter.com/QICjbU81Nx

— WHO in occupied Palestinian territory (@WHOoPt) May 31, 2021

ڈبلیو ایچ او کے عہدہ دار ریک پیپرکورن کا کہنا ہے کہ ’’صورت حال بہت ناگفتہ بہ ہے،ڈبلیوایچ او کواس پر سخت تشویش لاحق ہے۔غزہ میں بلاتعطل ضروری امدادی اشیاء پہنچائی جانی چاہییں اور جس کسی مریض کو بھی غزہ سے باہر لے جانے کی ضرورت پڑے،اس کی اجازت دی جائے۔‘‘انھوں نے کہا کہ ’’ فلسطینیوں کی زندگیاں زبوں حالی سے دوچار ہیں۔تنازع سے متاثرہ بہت سے افراد کو فوری امداد کی ضرورت ہے اور انھیں کووِڈ-19 سمیت صحت کے مختلف خطرات کا سامنا ہے۔

Staggering health needs emerge in the occupied Palestinian territory in the wake of recent escalations: https://t.co/YEizAdNTvn pic.twitter.com/3YxhaHPECq

— WHO in occupied Palestinian territory (@WHOoPt) June 2, 2021

واضح رہے کہ اپریل میں بعض حملوں کے بعد، مئی 2021 میں تشدد کا آغاز مقبوضہ بیت المقدس سے ہوا جو یہودیوں، مسلمانوں اور عیسائیوں کے لیے یکساں مقدس مقام ہے۔ یادرہے مصر کے توسط سے اسرائیل ور فلسطینی گروپوں کے بیچ غزہ کی پٹی میں فائر بندی کے نفاذ کا آغاز 21 مئی کی درمیانی شب 2 بجے سے ہوا۔ یہ فائر بندی 11 روز تک جاری رہنے والی عسکری جارحیت کے بعد سامنے آئی جو 2014ء کی جنگ کے بعد اب تک کی شدید ترین لڑائی قرار دی جا رہی ہے۔ اس دوران میں بڑی تعداد میں ہلاکتیں واقع ہوئیں جن میں اکثریت فلسطینیوں کی ہے۔۔