جموں و کشمیر میں شوال المکرم کا چاند نظر نہیں آیا، سنیچر کو ادا کی جائے گی عید الفطر کی نماز

سرینگر : جموں و کشمیر میں شوال المکرم کا چاند نظر نہیں آیا ہے اور عید الفطر کی نماز سنیچر کے روز ادا کی جائے گی ۔ اس کا اعلان جموں و کشمیر کے مفتی اعظم ناصر الاسلام نے جمعرات کو کیا ۔ انہوں نے بتایا کہ جموں و کشمیر کے کسی بھی حصے سے چاند نظر آنے کی کوئی شہادت موصول نہیں ہوئی اور اس لئے اس بات پر اتفاق رائے ہوا ہے کہ عید الفطر ہفتہ کو منائی جائے گی۔

بتادیں کہ سعودی عرب سمیت کئی خلیجی ممالک نے جمعرات کو شوال المکرم کا چاند نظر آنے کا اعلان کیا ہے ۔ سعودی عرب کے علاوہ متحدہ عرب امارات اور قطر میں بھی جمعہ کو عید الفطر کی نماز ادا کی جائے گی ۔

ادھر پاکستان میں عیدالفطر کی نماز ہفتہ کو ادا کی جائے گی ۔  جیو نیوز نے خبر دی ہے کہ پاکستان کی مرکزی رویت ہلال کمیٹی نے ملک کے کسی بھی حصے سے چاند کی رویت کی شہادت موصول نہیں ہونے کا اعلان کیا ہے۔ رپورٹ کے مطابق شوال کا چاند دیکھنے کیلئے مرکزی رویت ہلال کمیٹی کا اجلاس اسلام آباد میں ہوا ، کراچی، لاہور،  اسلام  آباد، پشاور  اور کوئٹہ میں چاند نظر آنے کی کوئی شہادت موصول نہیں ہوئی، جس کے بعد چاند نظر نہیں آنے کا اعلان کیا ۔

یہ بھی پڑھئے: سعودی عرب میں نظر آیا شوال المکرم کا چاند، جمعہ کو ادا کی جائے گی عید الفطر کی نماز

یہ بھی پڑھئے: Eid-ul-Fitr 2023 : عید الفطر سے قبل رنگ برنگی لائٹوں سے سجی مسجدیں، جگمگانے لگے شہر

علاوہ ازیں ملیشیا میں شوال کا چاند نظر نہیں آیا ہے اور ملیشائی حکومت کے مطابق ملائیشیا میں عیدالفطر 22 اپریل بروز ہفتہ ہوگی۔ نیز سنگاپور میں بھی شوال کا چاند نظر نہیں آیا، مجلس علماء اسلام سنگاپور کے مطابق سنگاپور میں عید الفطر 22 اپریل بروز ہفتہ ہوگی۔