جموں و کشمیر کے شوپیاں میں انکاونٹر ، سیکورٹی فورسیز نے چار دہشت گردوں کو مار گرایا

جموں و کشمیر سے ایک بڑی خبر آرہی ہے ، جہاں شوپیاں ضلع میں سیکورٹی فورسیز نے چار دہشت گردوں کو مار گرایا ہے ۔ اطلاعات کے مطابق شوپیاں ضلع میں سیکورٹی فورسیز کے ایک مشترکہ آپریشن کے دوران انکاونٹر میں ان چاروں دہشت گردوں کو مار گرایا گیا ۔ ان میں سے دو دہشت گردوں کا تعلق لشکر طیبہ سے بتایا جارہا ہے ۔

جموں و کشمیر پولیس کے ایک ترجمان نے بتایا کہ ضلع شوپیاں کے مانی ہل میں گزشتہ رات دیر گئے شروع ہونے والے ایک مسلح تصادم کے دوران چار دہشت گردوں کو ہلاک کیا گیا ۔ ان کا مزید کہنا تھا کہ مرنے والے دہشت گردوں کی شناخت معلوم کی جا رہی ہے ۔ نیز علاقے میں آپریشن جاری ہے۔

#UPDATE - Fourth terrorist eliminated in the encounter with security forces in Shopian. Arms recovered. Joint operation is underway: Indian Army#JammuAndKashmir

— ANI (@ANI) March 22, 2021

سرکاری ذرائع نے بتایا کہ شوپیاں کے مانی ہل میں دہشت گردوں کی موجودگی سے متعلق خفیہ اطلاع ملنے پر جموں و کشمیر پولیس اور دیگر سیکورٹی فورسز نے گزشتہ رات دیر گئے مذکورہ علاقے کو محاصرے میں لے کر تلاشی آپریشن شروع کیا۔

انہوں نے بتایا کہ ایک مشتبہ جگہ کی جانب پیش قدمی کے دوران وہاں موجود دہشت گردوں نے سکیورٹی فورسز پر فائرنگ کی ، جس کے بعد طرفین کے درمیان باضابطہ طور انکاونٹر شروع ہوا۔

آخری اطلاعات ملنے تک مسلح انکاونٹر میں چار دہشت گرد مارے جا چکے ہیں ، جن کی لاشیں برآمد کی گئی ہیں۔

نیوز ایجنسی یو این آئی کے ان پٹ کے ساتھ ۔