ہوم » نیوز » جموں وکشمیر

وادی کشمیر میں باغ گُل لالہ کی پی ایم مودی نے خاص انداز میں کی تعریف، کشمیری سیاحتی شعبے نے کیا خیر مقدم

وزیر اعظم نریندر مودی کی طرف سے سرینگر کشمیر میں واقع باغ گُل لالہ کے بارے میں دئے گئے بیان کا کشمیر کے سیاحتی شعبے سے وابستہ افراد نے خیر مقدم کیا ہے۔

  • Share this:
وادی کشمیر میں باغ گُل لالہ کی پی ایم مودی نے خاص انداز میں کی تعریف، کشمیری سیاحتی شعبے نے کیا خیر مقدم
وزیر اعظم نریندر مودی کی طرف سے سرینگر کشمیر میں واقع باغ گُل لالہ کے بارے میں دئے گئے بیان کا کشمیر کے سیاحتی شعبے سے وابستہ افراد نے خیر مقدم کیا ہے۔

سرینگر: وزیر اعظم نریندر مودی (Narendra Modi) کی طرف سے سرینگر کشمیر میں واقع باغ گُل لالہ کے بارے میں دئے گئے بیان کا کشمیر کے سیاحتی شعبے سے وابستہ افراد نے خیر مقدم کیا ہے۔ وزیر اعظم نے آج سماجی رابطہ سائیٹ ٹویٹر پر لکھا " کل یعنی پچیس مارچ جموں و کشمیر کے لئے ایک خاص دن ہے۔ زبرون پہاڑی سلسلے کے دامن میں واقع باغ گُل لالہ عوام کے لئے کھول دیا جائے گا۔ باغ میں 64 اقسام کے پندرہ لاکھ ٹیولپ کھلے ہوئے ہیں۔" وزیر اعظم نے لکھا کہ جب بھی آپ کو موقع ملے آپ جموں و کشمیر کی سیر پر جائیں اور ٹیولپ فیسٹول میں شریک ہوجائیں۔


انہوں نے لکھا کہ باغ گُل لالہ کی سیر کے علاوہ آپ جموں و کشمیر (Jammu and Kashmir) کے لوگوں کی پُر خلوص مہمان نوازی سے بھی لطف اندوز ہوجائیں گے۔ وزیر اعظم کے اس بیان سے جموں و کشمیر میں سیاحت کے شعبے سے وابستہ افراد کافی خوش ہیں ۔ ٹریول ایجنٹس ایسو سی ایشن آف کشمیر کے صدر فاروق احمد کٹھو کا کہنا ہے کہ وہ اس طرح کے پیغام کا بے صبری سے انتظار کر رہے تھے کیونکہ اس سے کشمیر میں سیاحت کی صنعت کو فروغ حاصل ہوگا۔



انہوں نے کہا کہ سیاحت کی صنعت سے وابستہ افراد کے وفود نے مرکزی وزرا اور ممبران پارلیمنٹ سے بارہا یہ کہا تھا کہ کشمیر کی سیاحتی صنعت کو بڑھاوا دینے کے لئے کچھ منفرد قدم اٹھائیے جائیں۔ نیوز ایٹین اردو کے اس نمائندے سے بات چیت کرتے ہوئے انہوں نے کہا "میری دانست کے مطابق شاید پہلی بار ملک کے کسی وزیر اعظم نے ایسا مثبت پیغام دیا ہے۔ میں سمجھتا ہوں کہ یہ موزون وقت پر دیا گیا ایک حوصلہ افزا پیغام ہے۔" انہوں نے کہا چونکہ زیادہ تر لوگ وزیر اعظم کی بات پر یقین رکھتے ہیں لہذا اس پیغام کا سیاحوں پر ایک مثبت اثر پڑے گا اور وہ زیادہ سے زیادہ تعداد میں وادی کا رُخ کریں گے۔



فاروق احمد کٹھو نے کہا " وزیر اعظم کا یہ پیغام ہمارے لئے USP ہوگا۔ ہم ملک اور بیرون ملک اس پیغام کی مارکیٹنگ کریں گے اور ہمیں توقع ہے کہ اس سے زیادہ سے زیادہ سیاحوں کو وادی کی سیر کے لئے راغب کرنے میں مدد ملے گی۔ " کشمیر چیمبر آف کامرس اینڈ انڈسٹریز کے قائیمقام صدر شیخ عاشق نے وزیر اعظم کے ٹویٹ کا خیر مقدم کرتے ہوئے کہا کہ یہ کشمیر کی سیاحت کو پروان چڑھانے میں مدد گار ثابت ہوگا۔ نیوز ایٹین اردو کے ساتھ بات چیت کرتے ہوئے انہوں نے کہا " وزیر اعظم نریندر مودی کی طرف سے صیح وقت پر ایسا بیان دینے سے سیاحوں اور سیاحت کی صنعت سے جُڑے لوگوں کے حوصلے بلند ہوں گے اور اس سال کشمیر کی سیر کرنے کے لئے آنے والے سیاحوں کی تعداد میں اضافہ دیکھنے کو ملنے کی امید ہے۔"

شیخ عاشق نے کہا کہ اس بیان سے نہ صرف سپرنگ ٹیورازم بلکہ موسم گرما کے دوران آنے والے سیاحوں کی تعداد میں بھی اضافہ ہوگا۔ سیاحت سے وابستہ دیگر افراد جیسے ہوٹل مالکان، ہائوس بوٹ مالکان اور شکارہ والوں نے بھی وزیر اعظم کے اس بیان کا خیر مقدم کیا ہے۔ واضح رہے کہ باغ گُل لالہ پچیس مارچ کو لوگوں کے لئے کھول دیا جائے گا اور اسکے بعد تین اور چار اپریل کو باغ میں ٹیولپ فیسٹول کا انعقاد کیا جارہا ہے۔
Published by: Sana Naeem
First published: Mar 24, 2021 05:34 PM IST