جموں و کشمیر : حزب المجاہدین کے چیف کمانڈر کو سیکورٹی فورسیز نے مار گرایا ، ایک دیگر گرفتار

جموں و کشمیر کے گرمائی دارالحکومت سری نگر کے مضافاتی علاقہ رنگریٹ میں اتوار کو ہونے والے ایک تصادم میں ایک دہشت گرد کو مار گرایا گیا ہے ۔ مارے گئے دہشت گرد کی شناخت حزب المجاہدین کے آپریشنل چیف کمانڈر سیف اللہ میر عرف غازی حیدر عرف ڈاکٹر سیف کے طور پر ہوئی ہے ۔ تصادم کے دوران دہشت گردوں کے ایک اعانت کار کو بھی زندہ پکڑا گیا ہے ۔

کشمیر زون پولیس کے انسپکٹر جنرل وجے کمار نے بتایا کہ رنگریٹ میں ہونے والے مختصر مسلح تصادم کے دوران حزب کمانڈر سیف اللہ میر کو مارگرایا گیا ہے جبکہ دہشت گردوں کے ایک اعانت کار کو زندہ پکڑا گیا ہے ۔ انہوں نے حزب المجاہدین کے چیف کمانڈر کی ہلاکت کو سکیورٹی فورسز کے لئے ایک بہت بڑی کامیابی قرار دیا ہے ۔

Dr Saifullah who was number one commander of Hizbul Mujahideen has been killed in the encounter. It was a very successful operation: Jammu and Kashmir DGP Dilbag Singh https://t.co/a6ycuuyXdh pic.twitter.com/6BX3yCvHSE

— ANI (@ANI) November 1, 2020

سیف اللہ میر کو رواں برس مئی میں سابق آپریشنل چیف کمانڈر ریاض نائیکو کی ہلاکت کے بعد اس کی جگہ چیف کمانڈر مقرر کیا گیا تھا ۔ ضلع پلوامہ کے ملنگ پورہ سے تعلق رکھنے والے سیف اللہ میر عرف غازی حیدر نے 2014 میں ریاض نائیکو کے مشورے پر ہی حزب المجاہدین کی صفوں میں شمولیت اختیار کی تھی ۔

سیکورٹی ایجنسیوں کو طویل عرصہ سے تھی تلاش

ایک پولیس افسر نے بتایا کہ علاقہ میں تلاشی کی کارروائی کے دوران دہشت گردوں نے ان پر گولہ باری شروع کردی تھی ۔ جوابی کارروائی کرتے ہوئے سیکورٹی فورسیز نے ایک دہشت گرد کو مار گرایا اور ایک دیگر کو زندہ گرفتار کیا ۔ افسران کے مطابق سیکورٹی ایجنسیوں کو کئی دہشت گردانہ معاملات میں سیف اللہ کی تلاش تھی ۔ انہوں نے جانکاری دی کہ ٹھکانے سے ہتھیار بھی برآمد کئے گئے ہیں ۔

نیوز ایجنسی یو این آئی کے ان پٹ کے ساتھ ۔