J&K Pulwama: پلوامہ میں سیکورٹی فورسیز نے کانسٹیبل ریاض احمد کے قتل میں ملوث ملی ٹینٹ سمیت تین کو مار گرایا

پلوامہ : جموں و کشمیر کے پلوامہ میں لشکر طیبہ کے تین ملی ٹینٹ سیکورٹی فورسیز کے ساتھ جھڑپ میں مارے گئے ہیں ۔ مرنے والے ملی ٹینٹوں میں پولیس کانسٹیبل ریاض احمد کے قتل میں ملوث جنید شیرگوجری بھی شامل ہے۔ اطلاعات کے مطابق ضلع پلوامہ کے دربگام علاقے میں سیکورٹی فورسیز اور ملی ٹینٹوں کے درمیان ہوئے انکاونٹر میں لشکر طیبہ کے تین مقامی ملی ٹینٹ ہلاک  ہوگئے ۔ ہفتہ کی شام کو فوج  اور سی آر پی ایف کے علاوہ جموں و کشمیر پولیس کی مشترکہ  پارٹی نے بونہ گام دربگام کا اس وقت محاصرہ کیا، جب علاقہ میں دو سے تین ملی ٹینٹوں کی اطلاع موصول ہوئی ۔

 

یہ بھی پڑھئے: وادی کشمیر میں ٹارگیٹ کلنگز کے خلاف آواز بلند کریں عوام : ایل جی منوج سنہا

اس دوران نزدیکی میوہ باغات میں چھپے ملی ٹینٹوں نے سیکورٹی فورسیز پر فائرنگ کی ۔  گولیوں کے تبادلے میں ایک ملی ٹینٹ کو رات میں مار گرایا گیا ۔ رات ہونے کے سبب سیکورٹی فورسیز نے پورے علاقہ کا محاصرہ کرلیا اور لائٹیں نصب کی گئیں ۔ آج علی الصبح گولیوں کے تبادلے میں مزید دو ملی ٹینٹ ہلاک ہوگئے ۔

 

یہ بھی پڑھئے: کشمیری یوٹیوبر فیضل وانی گرفتار، Nupur Sharma پر بنایا تھا متنازعہ ویڈیو

ہلاک شدہ ملی ٹینٹوں کی شناخت پلوامہ کے جنید شیرگوجری اور عرفان ملک کے علاوہ فیصل نظیر بٹ کے بطور ہوئی ہے ۔ پولیس کے مطابق جنید شیرگوجری پولیس کانسٹیبل ریاض احمد کی ہلاکت میں ملوث تھا ۔

خیال رہے کہ کانسٹیبل ریاض کو ملی ٹینٹوں نے رواں سال مئی کے مہینے میں گڈورہ پلوامہ میں شہید کردیا تھا ۔ ہلاک شدہ ملی ٹینٹوں کے قبضے سے دو اے کے 47 رائفلیں اور ایک پستول برآمد ہوا ہے۔