جموں وکشمیر: گپکار الائنس کو لے کر فاروق عبداللہ نے کہا- ہم ملک کے نہیں، بی جے پی کے دشمن ہیں

سری نگر: پیپلز الائنس فار گپکار ڈکلریشن (Peoples Alliance for Gupkar Declaration) اور نیشنل کانفرنس کے صدر فاروق عبداللہ (Farooq Abdullah) نے پیر کو کہا کہ ہم ملک کے نہیں، بی جے پی (BJP) کے دشمن ہیں۔ وہ لوگ ہندو، مسلم، سکھ اور عیسائی کو ایک دوسرے سے الگ کرنا چاہتے ہیں۔ ہم مہاتما گاندھی (Mahatma Gandhi) کے ہندوستان میں یقین کرتے ہیں، جہاں سب ایک دوسرے کے برابر ہیں۔

واضح رہے کہ پیپلز الائنس فار گپکار ڈکلریشن نے ریاست میں 28 نومبر سے ہونے والے آئندہ ڈسٹرکٹ ڈیولپمنٹ کونسل (ڈی ڈی سی) الیکشن لڑنے کا اعلان کیا ہے۔ اس بارے میں بولتے ہوئے فاروق عبداللہ نے کہا، ’ہم گینگ نہیں ہیں، بلکہ پارٹیوں کا اتحاد ہیں، جو لوگ ہمیں گینگ بلاتے ہیں، وہ سب سے بڑے ڈکیت ہیں اور سب کو گینگ کے طور پر دیکھتے ہیں’۔

فاروق عبداللہ نے کہا کہ ہم ایک دوسرے کے ساتھ معاون کے طور پر الیکشن لڑیں گے، الائنس کی سبھی پارٹیوں کو ایک انتخابی نشان نہیں مل سکتا، اس لئے سبھی جماعتیں اپنے اپنے نشان پر الیکشن لڑیں گی اور مشترکہ امیدوار اتاریں گی۔ مرکز کے زیر انتظام جموں وکشمر نے گزشتہ ہفتے ریاست میں ڈسٹرکٹ ڈیولپمنٹ کونسل الیکشن کے ساتھ پنچایت اور نگر پالیکا ضمنی انتخابات کا اعلان کیا ہے۔ یہ الیکشن ریاست میں 8 مرحلوں میں کرائے جائیں گے۔

دوسری جانب، مرکز کے زیر انتظام جموں وکشمیر کی ریاستی انتظامیہ کے مرکزی دفتر سول سکریٹریٹ نے پیر کو جموں سے کام کرنا شروع کردیا۔ جموں وکشمیر کے ریاستی الیکشن کمشنر کے کے شرما نے گزشتہ جمعرات کو 20 اضلاع میں ڈسٹرکٹ ڈیولپمنٹ کونسل (ڈی ڈی سی) کے لئے الیکشن اور پنچایتوں کے ضمنی انتخابات کے لئے پہلی نوٹیفکیشن جاری کی۔ ڈی ڈی سی الیکشن 28 نومبر سے 22 دسمبر تک 8 مراحل میں ہوں گے۔