مقررہ حد کے اندر ہے اڈانی گروپ میں ایس بی آئی اور ایل آئی سی کی سرمایہ کاری: نرملا سیتارمن

نئی دہلی : بجٹ 2023-24 پیش کرنے کے بعد مرکزی وزیر خزانہ نرملا سیتا رمن نے کسی بھی پرائیویٹ ٹی وی نیوز کو اپنا پہلا انٹرویو نیٹ ورک 18 کے ایڈیٹر ان چیف راہل جوشی کو دیا۔ نرملا سیتارمن نے بتایا کہ ہندوستانی اسٹاک مارکیٹ مضبوط ہے۔ اس پر بجٹ کے مثبت اثرات آنے والے دنوں میں نظر آئیں گے۔ وزیر خزانہ نے اڈانی کے شیئروں میں گراوٹ اور اس کے شیئر بازار، ایس بی آئی اور ایل آئی سی پر اس کے اثرات پر بھی جواب دیا۔

وزیر خزانہ نرملا سیتا رمن نے کہا کہ دونوں اداروں کے سی ایم ڈی نے اس پر تفصیلی بیان دیا ہے۔ وہ واضح کرچکے ہیں کہ اڈانی گروپ میں ان کی محدود سرمایہ کاری ہے جو کہ مقررہ حد کے اندر کی گئی ہے۔ اڈانی گروپ کے شیئروں میں سرمایہ کاری سے ان کو ابھی تک منافع ہوا ہے۔ مارکیٹ ریگولیٹرز بہت اچھا کام کر رہے ہیں۔ ہندوستانی شیئر بازار پر سرمایہ کاروں کا اعتماد بڑھ رہا ہے۔

ہندوستانی بازار میں غیر ملکی سرمایہ کاروں کے رویہ کے بارے میں سیتا رمن نے کہا کہ سرمایہ کاروں کے رویہ میں تبدیلی عام بات ہے۔ انہوں نے ہندوستانی بینکنگ سیکٹر کی حالت کو مضبوط قرار دیتے ہوئے کہا کہ بینکوں کا این پی اے کم ہورہا ہے اور آج ہندوستانی بینک تیزی سے ترقی کررہے ہیں۔

پبلک سیکٹر کے بینکوں کی نجکاری کے سوال پر نرملا سیتا رمن نے کہا کہ اس سلسلے میں کارروائی جاری ہے۔ تاہم انہوں نے یہ بتانے سے انکار کر دیا کہ حکومت کس بینک کی نجکاری کرنا چاہتی ہے۔ انہوں نے کہا کہ فی الحال ہندوستانی بینکنگ سیکٹر آرام دہ حالت میں ہے۔ انہیں بازار سے اچھے پیسے مل رہے ہیں۔ پرائیویٹائزیشن کی ہماری کارروائی مسلسل جاری ہے۔

یہ بھی پڑھئے: منریگا کے مزدوروں کو بھی ملے گا پی ایم آواس یوجنا کا فائدہ:مرکزی وزیر خزانہ نرملا سیتارمن

یہ بھی پڑھئے: 'گیم چینچر ثابت ہوگی پی ایم وکاس یوجنا...'بجٹ پر وزیراعظم سے لگاتار بات ہوئی:نرملا سیتارمن

ہندوستانی معیشت پر تبصرہ کرتے ہوئے نرملا سیتا رمن نے کہا کہ ہندوستانی معیشت مسلسل ترقی کر رہی ہے۔ ہر شعبے میں مانگ بڑھ رہی ہے۔ کچھ سروے میں کمزور دیہی مانگ کے دعووں پر انہوں نے کہا کہ ایسا نہیں ہے۔ دیہی معیشت بھی بڑھ رہی ہے۔ زرعی مشینری کی بڑھتی ہوئی مانگ اور جی ایس ٹی کلیکشن میں اضافے سے اس کا پتہ چلتا ہے۔ ہم دیہی اور شہری دونوں علاقوں میں ترقی دیکھ رہے ہیں۔