کورونا وائرس : شاہین باغ میں احتجاج کی جگہ پر چل رہا باغ شاہین اسکول بند

شاہین باغ میں مظاہرہ کی جگہ پر چلنے والے بچوں کے اسکول کو کورونا وائرس کی وجہ سے بند کردیا گیا ہے ۔ خیال رہے کہ شاہین باغ مظاہرے میں باغ شاہین نامی اسکول چلایا جارہا تھا ، جس میں تقریبا  70 بچے روزانہ صبح 11 بجے سے شام 4 بجے تک تعلیم حاصل کرتے تھے ۔  یہ اسکول جو شام 4 بجے تک چلتا تھا ، اس کو احتیاط کے طور پر 31 مارچ تک بند کردیا گیا ہے ۔

اسکول چلانے والی  کہکشاں زاہد  کا کہنا ہے کہ کورونا وائرس کی وجہ سے اسکول احتیاط کے طور پر بند ہے ۔ اس اسکول میں وہ تمام بچے پڑھتے تھے ، جن کی مائیں احتجاج میں شامل ہونے کیلئے آتی تھیں یا پھر جو بچے چھٹیاں ہونے کے بعد پڑھنے آنا چاہتے تھے ، ان کو تعلیم دی جاتی تھی ۔ لیکن اب اس کو بند کر دیا گیا ہے ۔



قابل ذکر ہے کہ تقریبا تین ماہ سے شاہین باغ میں خواتین شہریت ترمیمی قانون ، این آر سی اور این پی آر کے خلاف دھرنے پر بیٹھی ہیں ۔