ہر ہندوستانی شہری کووڈ-19 سے پریشان، مفت ٹیکہ ملک کے لوگوں کا حق: وزیر اعلیٰ اروند کیجریوال

نئی دہلی: بھارتیہ جنتا پارٹی (بی جے پی) کے بہار اسمبلی الیکشن کے لئے سنکلپ پتر میں ریاست کے لوگوں کو کورونا ویکسن مفت مہیا کرانے کے وعدے پر دہلی کے وزیراعلی اروند کیجریوال نے ہفتہ کو بی جے پی کو گھیرا اور کہا کہ اس پر سبھی کا حق ہے اور یہ پورے ملک میں مفت ملنی چاہئے۔ شمال مشرقی دہلی کے شاستری پارک کے نزدیک سیلم پور فلائی اوور کو عوام مختص کرنے آئے مسٹر کیجریوال نے کہاکہ کورونا ویکسن بہار میں ہی کیوں، پورے ملک کو مفت میں مہیا ہونی چاہئے۔ ملک میں سبھی لوگ کورونا سے پریشان ہیں ۔یہ پورے ملک کا حق ہے۔ انہوں نے کہاکہ جب عالمی وبا کووڈ 19 کی ویکسن آئے گی تو دیکھتے ہیں کہ کتنے کی اور کیسی ہے۔ مسٹر کیجریوال نے بی جےپی کے اس وعدے پر سوال کیا اور کہا کہ غیر بی جےپی حکومت والی ریاستوں کا کیا ہوگا؟ جنہوں نے بی جے پی کو ووٹ نہیں دیا انہیں یہ ٹیکا مفت میں نہیں دیا جائےگا؟

دہلی کے وزیر اعلیٰ اروند کیجریوال نے کہا کہ اس فلائی اوور کی اندازاً لاگت 303 کروڑ روپے تھی جبکہ یہ 250 کروڑ روپے میں بن کر تیار ہوا ہے۔ دہلی کی ایماندار حکومت نے دارالحکومت کے عوام کے 53کروڑ روپے بچائے۔ وزیر خزانہ نرملا سیتارمن نے جمعرات کو بہار اسمبلی انتخابات کےلئے پارٹی کا سنکلپ پتر(انتخابی منشور) جاری کیا تھا جس میں یہ وعدہ کیا گیا ہے کہ حکومت بننے پر ریاست میں کورونا ویکسن سبھی کو مفت مہیا کرائی جائے گی۔

जब कोरोना वैक्सीन बनकर तैयार हो जाये तो यह पूरे देश को फ्री मिलनी चाहिए। फ्री कोरोना वैक्सीन हर भारतीय का अधिकार है।- माननीय मुख्यमंत्री श्री @ArvindKejriwalhttps://t.co/qXGWxjVNob

— AAP (@AamAadmiParty) October 24, 2020

بہار اسمبلی کا الیکشن بی جےپی قومی جمہوریہ اتحاد(این ڈی اے) کے اتحادی کے طورپر وزیراعلی نتیش کمار کی قیادت میں لڑرہی ہے۔ اس سے پہلے بی جےپی کے کورونا ویکسن کے وعدے پر کانگریس کے سابق صدر راہل گاندھی نے بھی ٹویٹ کرکے نشانہ لگاتے ہوئے کہا تھا۔’’ ہندوستانی حکومت نے کووڈ تقسیم کا اعلان کردیا ہے۔ یہ جاننے کے لئے ویکسن اور جھوٹے وعدے آپ کو کب ملیں گے،مہربانی کرکے اپنی ریاست کے چناؤ کی تاریخ دیکھیں۔‘‘

واضح رہے کہ پورے ملک میں کورونا وائرس سے ابھی تک 78 لاکھ سے زیادہ معاملے سامنے آئے ہیں جبکہ اس سے تقریباً ایک لاکھ 18 ہزار اموات ہوئی ہیں۔ وہیں دہلی میں تقریباً ساڑھے تین لاکھ کووڈ-19 کے کیس آچکے ہیں اور 6 ہزار اموات ہوئی ہیں۔ ڈاکٹر اور ماہرین تیوہاری سیزن شروع ہونے کے ساتھ ہی دہلی اور پورے ملک میں کورونا وائرس معاملوں کے مزید بڑھنے کا خدشہ ظاہر کر رہے ہیں۔