دہلی شراب پالیسی کیس: منیش سسودیا کو لگا بڑا جھٹکا، قریبی نے مانگی سرکاری گواہ بننے کی اجازت

نئی دہلی : دہلی کی شراب پالیسی کو لے کر نائب وزیر اعلی منیش سسودیا کو بڑا جھٹکا لگا ہے ۔ سسودیا کے قریبی اور آبکاری پالیسی معاملہ میں ملزم دنیش اروڑہ نے سرکار گواہ بننے کی اجازت مانگی ہے ۔ دنیش اروڑہ نے حلف لیا ہے کہ وہ کسی دباو کے بغیر سرکاری گواہ بننا چاہتے ہیں ۔ اس نے اپنے اوپر لگے الزامات کو معاف کئے جانے کی عرضی داخل کی ہے ۔ اس کی عرضی پر عدالت 14 نومبر کو سماعت کرے گی اور اس کا بیان درج ہوگا ۔ راوز ایوینیو کورٹ اس کے بعد طے کرے گا کہ دنیش اروڑہ کو سرکاری گواہ بنایا جائے یا نہیں ۔

غور طلب ہے کہ سی بی آئی نے پہلے بھی کہا تھا کہ دہلی کے نائب وزیر اعلی منیش سسودیا کے قریبی شراب پالیسی کیس میں سرکاری گواہ ہوں گے ۔ بتادیں کہ سسودیا کے قریبی کاروباری دنیش اروڑہ کو کورٹ نے ضمانت دیدی تھی اور سی بی آئی نے اس کی مخالفت بھی نہیں کی تھی ۔ سی بی آئی نے کورٹ میں اپیل دائر کرکے کہا کہ اروڑہ منیش سسودیا کے خلاف کیس میں اس کے گواہ ہوں گے ۔ سی بی آئی نے عدالت کو بتایا کہ اروڑہ نے جانچ کے دوران تعاون کیا اور ساری اہم جانکاریاں دیں ۔

یہ بھی پڑھئے: EWS کو 10فیصد ریزرویشن پر سپریم کورٹ کی مہر، مرکزی حکومت کی بڑی جیت

یہ بھی پڑھئے: ایس جے شنکر کا دورہ روس، روس۔ یوکرین تنازعہ سے متعلق ہندوستان کا کیا ہوگا تازہ موقف؟

جانکاری کے مطابق اروڑہ کی پیشگی ضمانت کی عرضی اس وقت پیش ہوئی جب سی بی آئی نے وجے نائر اور ای ڈی نے سمیر مہندرو کو گرفتار کیا ۔ الزام ہے کہ مہندرو نے ایک کروڑ روپے رادھا انڈسٹریز کے اکاونٹ میں ٹرانسفر کئے۔ یہ انڈسٹری اروڑہ کی ہے ۔ یہ بھی الزام ہے کہ انٹرٹینمنٹ ایوینٹ مینجمنٹ فرم آنلی مچ لاوڈر کے سابق سی ای او مہندرو نے وجے نائر کیلئے دو سے چار کروڑ روپے ارجن پانڈے کو دئے ۔ پانڈے بھی سسودیا کا قریبی ہے ۔

 

سی بی آئی نے اس معاملہ میں ان الزامات کے علاوہ حیدرآباد کے کاروباری ابھیشیک بوئنپلی کو بھی گرفتار کیا ہے ۔ دوسری جانب ای ڈی اس معاملہ سے وابستہ دستاویز اور گواہوں کو جمع کررہی ہے، تاکہ اس معاملہ میں ہوئی منی لانڈرنگ کا پتہ چل سکے ۔