Budget Session : چیلنج کتنا بڑا کیوں نہ ہو ، نہ ہم رکیں گے اور نہ ہندوستان رکے گا : صدر جمہوریہ رام ناتھ کووند

صدر جمہوریہ رام ناتھ کووند کے خطاب کے ساتھ ہی پارلیمنٹ کے بجٹ سیشن کا آغاز ہوگیا ہے ۔ صدر جمہوریہ نے اپنے خطاب میں کہا کہ چیلنجز کتنے بڑے کیوں نہ ہوں ، نہ ہم رکیں گے اور نہ ہندوستان رکے گا ۔ ہندوستان جب جب متحد ہوا ہے تب تب اس نے ناممکن سے نظر آنے والے اہداف کو حاصل کیا ہے ۔ کورونا وائرس کے قہر کا تذکرہ کرتے ہوئے انہوں نے کہا کہ وبا کے خلاف اس لڑائی میں ہم نے بہت سے باشندگان وطن کو کھویا بھی ہے ۔ ہم سبھی کے محبوب سابق صدر جمہوریہ پرنب مکھرجی کا انتقال بھی کورونا کے دور میں ہی ہوا ۔ پارلیمنٹ کے چھ اراکین بھی کورونا کی وجہ سے ہمیں چھوڑ کر چلے گئے ، میں سبھی کو اپنی خراج عقیدت پیش کرتا ہوں ۔

صدر جمہوریہ نے کہا کہ مجھے اطمینان ہے کہ میری حکومت کے بروقت لئے گئے صحیح فیصلوں سے لاکھوں باشندگان وطن کی جان بچ گئی ۔ آج ملک میں کورونا کے نئے مریضوں کی تعداد بھی تیزی سے کم ہورہی ہے اور جو انفیکشن سے ٹھیک ہوچکے ہیں ، ان کی تعداد بھی بہت زیادہ ہے ۔

I am satisfied that the timely decision taken by my Government saved the lives of lakhs of citizens. Today the number of new COVID cases is going down rapidly. The number of recoveries is very high: President Ram Nath Kovind, in Parliament#BudgetSession pic.twitter.com/JzvhPj3Rvc

— ANI (@ANI) January 29, 2021

صدر جمہوریہ نے کہا کہ معیشت کو سنبھالنے کیلئے ریکارڈ اقتصادی پیکج کے اعلان کے ساتھ ہی میری حکومت نے اس بات کا بھی خیال رکھا کہ کسی غریب کو بھوکا نہ رہنا پڑے ۔ صدر جمہوریہ نے کہا کہ پردھان منتری غریب کلیان یوجنا کے ذریعہ آٹھ مہینوں تک 80 کروڑ لوگوں کو پانچ کلو فی ماہ اضافی اناج مفت دیا گیا ۔ سرکار نے مہاجر مزدوروں اور اپنے گھر سے دور رہنے والے لوگوں کی بھی فکر کی ۔

صدرجمہوریہ نے کہا کہ وبا کی وجہ سے شہروں سے واپس لوٹے مہاجر مزدوروں کو ان کے ہی گاوں میں کام دینے کیلئے میری حکومت نے چھ ریاستوں میں غریب کلیان روزگار مہم بھی چلائی ۔ اس مہم کی وجہ سے پچاس کروڑ مین ڈیز کے برابر روزگار پیدا ہوئے ۔