உங்கள் மாவட்டத்தைத் தேர்வுசெய்க

    مدھیہ پردیش : جمعیت علما نے ہندی زبان میں قران سکھانے کی شروع کی مہم

    مدھیہ پردیش : جمعیت علما نے ہندی زبان میں قران سکھانے کی شروع کی مہم

    مدھیہ پردیش : جمعیت علما نے ہندی زبان میں قران سکھانے کی شروع کی مہم

    ممتاز عالم دین مولانا اظہر بیگ ندوی کہتے ہیں کہ مدھیہ پردیش جمیعت علما کے صدر حاجی محمد ہارون کی قیادت میں قران سکھانے کی جو مہم شروع کی گئی ہے وہ وقت کی ضرورت ہے۔

    • Share this:
    بھوپال : راجدھانی بھوپال کو علم و ادب ، تہذیب و تمدن اور اسلامی علوم کا گہوارہ کہا جاتا ہے ، لیکن یہاں پر مسلم سماج کی ایک بڑی تعداد ایسی ہے اور جنہوں نے اپنی زندگی کا بڑا حصہ اس انتظار میں گزاردیا کہ کوئی انہیں عربی زبان سکھانے والا مل جائے تو وہ قران پڑھ سکیں ۔ جمیعت علما بھوپال نے ایسے لوگوں کو جو عربی زبان سے نا واقف ہیں لیکن مقامی زبان یعنی ہندی اور اردو زبان سے واقف ہیں ان کے لئے مقامی زبان ہندی اور اردو میں قران کا درس دینے کا سلسلہ شروع کیا ہے ۔

    مدھیہ پردیش جمیعت علما کے پریس سکریٹری حاجی محمد عمران کہتے ہیں کہ ہم نے تعلیم کے ایک سروے میں دیکھا کہ مسلم کمیونٹی میں ایسے لوگوں کی ایک بڑی تعداد ہے ، جو قران کو پڑھنا چاہتے ہیں ، لیکن ان کی مشکل یہ ہے کہ وہ عربی زبان نہیں جانتے ہیں ، ایسے لوگوں میں مرد وخواتین کے ساتھ سبھی عمروں کے لوگ موجود ہیں۔ ایسے لوگوں کی ضرورت کو دیکھتے ہوئے جمعیت علما بھوپال نے آؤ قران سیکھیں کے عنوان سے مہم شروع کی ہے اور ان لوگوں کو جو عربی زبان سے نا واقف ہیں انہیں ہندی میں قران پاک مہیا کرنے کا سلسلہ شروع کیا ہے ۔ تاکہ وہ ہندی زبان میں قران سیکھ سکیں اور اس کے ساتھ اس بات کی بھی ہدایت کی جا رہی ہے کہ انہیں جب بھی موقع ملے وہ عربی زبان کو بھی سیکھ کر اپنی زندگیوں کو منور کریں۔

    ممتاز عالم دین مولانا اظہر بیگ ندوی کہتے ہیں کہ مدھیہ پردیش جمیعت علما کے صدر حاجی محمد ہارون کی قیادت میں قران سکھانے کی جو مہم شروع کی گئی ہے وہ وقت کی ضرورت ہے۔ قران سبھی کے لئے ہے اور اس کی تعلیمات رہتی دنیا تک کے لئے ہیں اور اب تو اتنی آسانی ہوگئی ہے کہ قران عربی زبان کے علاوہ دنیا کی بیشتر زبانوں میں موجود ہے ۔ایسے میں وہ لوگ جو عربی زبان سے نا واقف ہیں اور قران کو سیکھنا اورپڑھنا چاہتے ہیں ان کو ہندی میں قران مہیا کرنا اہم قدم ہے اور لوگوں نے اسے خندہ پیشانی سے قبول کیا ہے ۔

    وہیں بھوپال بھان پورا کے محمد رضوان کہتے ہیں کہ میں زندگی کی پچاس بہاریں دیکھ چکا ہوں اورقران پڑھنے کی بڑی خواہش تھی لیکن عربی زبان نہیں جاننے کے سبب اب تک قران کی تعلیم سے دور رہا ۔ حالانکہ میں ہندی میں اپنے سارے کام کر لیتاہوں ۔ آج مجھے ہندی میں قران مہیا کرایا گیا ہے ۔ ان شا اللہ اب اسے پڑھ کر اس کی تعلیم کو اپنے اندر اتارنے کی پوری کوشش کرونگا اور دیرینہ خواب پورے ہونگے۔

    وہیں فریحہ کہتی ہیں کہ قران ہندی زبان میں ہے ، اس کے بارے میں ہمیں کوئی اطلاع نہیں تھی۔ ہم نے زندگی کے چالیس سال اس انتظار میں نکال دئے کہ کوئی عربی زبان سکھانے والا ملے تو ہم قران پڑھیں ۔ آج ہمارے ہی نہیں ہمارے ساتھ جو بہنیں یہاں آئی ہیں نیلوفر ،شبانہ وغیرہ کے بھی ادھورے خواب پورے ہوئے ہیں ۔اب ہم ہندی زبان میں قران کی آیات اور دعائیں سیکھ کر اپنی نماز تو درست کر سکیں گے ۔

    جمیعت علما بھوپال کے ضلع صدر حافظ اسمعیل بیگ کہتے ہیں کہ ابھی ابتدائی طور پر ہندی اردو اور دیگر مقامی زبانوں میں قران کو فراہم کرنے کی مہم بھوپال سے شروع کی گئی ہے ، لیکن جس طرح سے اس کا ریسپانس مل رہا ہے ، اسے دیکھتے ہوئے ایسا محسوس ہوتا ہے کہ ایسے لوگوں کی بڑی تعداد میں مدھیہ پردیش میں موجود ہیں جو عربی زبان نہیں جاننے کے سبب قران کی تعلیم سے دور ہیں ۔ ایسے لوگوں تک ہندی اردو اور دیگر مقامی زبانوں میں قران فراہم کرنے کے لئے ریاست گیر سطح پر مہم چلائی جائی گی ۔
    Published by:Imtiyaz Saqibe
    First published: