India-China Rift: رافیل آنے کے بعد دہشت میں چین ، پاکستان کے ساتھ مل کر کر رہا ہے یہ چار بڑی تبدیلیاں: ذرائع

ہندوستانی فضائیہ کی طاقت سے چین ایئرفورس دہشت میں ہے ۔ ذرائع کی مانیں تو ایسا ہندوستان میں جنگی طیارہ رافیل آنے کے بعد ہوا ہے ۔ رافیل کی مار سے بچنے کیلئے چین اب نئے طریقے کے ہینگر ( جہاز کھڑے کرنے کی جگہ) بنا رہا ہے ۔ ہوائی پٹیوں کو اپ ڈیٹ کررہا ہے ۔ اس کام کیلئے چین پاکستان کی مدد بھی لے رہا ہے ۔ خفیہ رپورٹ کے مطابق بالاکوٹ میں ہوئی ایئراسٹرئیک سے بھی سبق لیتے ہوئے چین کئی بڑی تبدیلیاں کررہا ہے ۔

انڈین ایئرفورس نے بالاکوٹ میں دہشت گردوں کی کیمپ کو گراونڈ پینیٹریٹنگ بم سے نشانہ بنایا تھا ۔ ایک خفیہ رپورٹ کے مطابق چین اس بات سے اچھی طرح واقف ہے ۔ یہی وجہ ہے کہ چین اب چاروں طرف سے بند ہینگر بنا رہا ہے ، جہاں وہ اپنے جنگی جہازوں کو ہندوستانی فضائیہ کے جنگی طیاروں سے محفوظ رکھ سکے ۔ اس کیلئے ہینگر کی دیواریں تین میٹر تک موٹی بنائی جارہی ہیں ۔

وہیں دوسری طرف ہینگر کا دروازہ سنگل پیس ہائی اسٹرانگ اسٹیل پلیٹ سے تیار کیا جارہا ہے ، جس سے حملے کے دوران اگر 300 سے 500 کلو کے بم ، کروز میزائل اور گراونڈ پینیٹریٹنگ بم سے حملہ ہو ، تو اس کے جنگی طیارے محفوظ رہ سکیں ۔

ہندوستانی فضائیہ کی بڑھتی طاقت سے چین اس قدر خوفزدہ ہے کہ اس نے اپنے ائیرفورس اسٹیشن کو بھی اپ ڈیٹ کرنا شروع کردیا ہے ۔ اس کام میں پاکستان بھی اس کا ساتھ دے رہا ہے ۔ خفیہ جانکاری رپورٹ کے مطابق چین پاکستان کی مدد سے گلگت بلتستان میں اسکاردو ائیربیس کو بھی اپ ڈیٹ کررہا ہے ۔

وہاں نہ صرف نیا رنوے تیار کیا جارہا ہے بلکہ ائیرفیلڈ پر ایسی لائٹیں لگائی جارہی ہیں جس سے دن رات چوبیس گھنٹے خراب سے خراب موسم میں بھی ایئرآپریشن کیا جاسکے ۔ اس لائٹنگ سسٹم کے لگنے کے بعد چین رات اور خراب موسم میں بھی اپنے جنگی طیاروں کو آسانی سے لینڈ کراسکے گا ۔