دگ وجے سنگھ نے سرجیکل اسٹرائیک پر اٹھایا سوال، کانگریس نے پلہ جھاڑا، بی جے پی کا پلٹ وار

نئی دہلی : ان دنوں کانگریس کی بھارت جوڑو یاترا جموں و کشمیر میں ہے ۔ اس دوران کانگریس پارٹی کے سینئر لیڈر دگ وجے سنگھ نے ایک مرتبہ پھر سے پاکستان کے خلاف ہوئی سرجیکل اسٹرائیک کو لے کر سوال اٹھایا ہے ، جس کے بعد سے ملک میں سرجیکل اسٹرائیک کو لے کر پھر سیاسی بحث شروع ہوگئی ہے ۔ دگ وجے سنگھ کے ذریعہ سرجیکل اسٹرائیک پر تبصرہ کرنے کے بعد بی جے پی نے پلٹ وار کیا ہے ۔ بی جے پی کے ترجمان گورو بھاٹیہ نے کہا کہ کانگریس پارٹی کا کیریکٹر ہ غیرذمہ دارانہ بیان دینا ہے ۔ ہمارے سیکورٹی اہلکاروں کے خلاف بولنے والے کو ملک برداشت نہیں کرے گا۔

وہیں کانگریس پارٹی نے دگ وجے سنگھ کے اس بیان سے پلہ جھاڑ لیا ہے ۔ کانگریس پارٹی کے جنرل سکریٹری جے رام رمیش نے ٹویٹ کرکے کہا کہ آج سینئر لیڈر دگ وجے سنگھ کے ذریعہ ظاہر کئے گئے خیالات کانگریس پارٹی کے نہیں ہیں ، ان کے ذاتی خیالات ہیں ۔

انہوں نے مزید لکھا کہ 2014 سے پہلے یو پی اے سرکار نے بھی سرجیکل اسٹرائیک کی تھی۔ ملک کے مفاد میں سبھی فوجی کارروائیوں کی کانگریس نے حمایت کی ہے اور آگے بھی حمایت کرے گی ۔

بتادیں کہ دگ وجے سنگھ نے کہا کہ سرجیکل اسٹرائیک کی بات کرتے ہیں کہ ہم نے اتنے لوگوں کو مار گرایا ، لیکن اس کا آج تک  کوئی ثبوت نہیں ہے ۔ اس کے علاوہ دگ وجے سنگھ کئی دیگر معاملات پر بھی مرکزی سرکار پر سوالات اٹھائے ۔



جموں میں بھارت جوڑو یاترا کے دوران کانگریس لیڈر دگ وجے سنگھ نے کہا کہ حکومت یہاں کا فیصلہ نہیں کرنا چاہتی ۔ یہاں کی پریشانی کا نمٹارہ نہیں کرنا چاہتی ۔ یہ پریشانی بنائے رکھنا چاہتی ہے تاکہ کشمیر فائلس جیسی فلم بنتی رہیں اور ہندو ۔ مسلمان میں نفرت پھیلاتے رہیں ۔

یہ بھی پڑھئے: پہلوانوں کی شکایت پر ایکشن میں مودی سرکار، دیا جانچ کا حکم، میری کام سے بھی لی مدد

یہ بھی پڑھئے: مہاراشٹر کے گورنر کا عہدہ چھوڑنا چاہتے ہیں کوشیاری، کہا : 'وزیراعظم مودی کو بتادیا ہے'

دگ وجے سنگھ نے کہا کہ پلوامہ جو کہ پوری طرح سے دہشت گردی کا مرکز بن چکا ہے، باہر گاڑی کی چیکنگ ہوتی ہے، وہاں ایک اسکارپیو گاڑی الٹی سمت سے آتی ہے اور اس کی جانچ پڑتال کیوں نہیں ہوئی اور اس کے بعد وہ ٹکراتی ہے۔ ہمارے 40 سی آر پی ایف کے جوان شہید ہوجاتے ہیں۔