بڑی خبر: شاہجہانی جامع مسجد4 جولائی سے عوام کے لئے کھل جائے گی
بڑی خبر: شاہجہانی جامع مسجد کے کھلنے سے متعلق بڑا اعلان
دہلی کی شاہجہانی جامع مسجد کھولنے کےبعد عام لوگ تین وقت کی نماز ہی ادا کر سکیں گے۔ وضو گھر سے کر کے آنے کا مشورہ دیا گیا ہے کیونکہ جامع مسجد کے حوض میں پانی نہیں ملے گا۔ جائے نماز بھی اپنے ساتھ لائیں۔
- News18 Urdu
- Last Updated :
نئی دہلی: طویل انتظار کے بعد بالآخر عام لوگوں کے لئے دہلی کی شاہی جامع مسجد کھلنے جا رہی ہے۔ دہلی کی شاہجہانی جامع مسجد کھولنے کو لے کر اہم اعلان کیا گیا ہے۔ ہفتہ، 4 جولائی 2020 کو دوپہر 12:30 بجے عام لوگوں کے لئے مسجد کھول دی جائے گی۔ مسجد کھولنے سے متعلق کچھ ضوابط بنائے گئے ہیں، اس پر سختی سے عمل کیا جائے گا۔ عام لوگ ظہر عصر اور مغرب کی نماز ہی جامع مسجد میں ادا کر سکیں گے۔ ظہر کی نماز کے بعد مسجد بند کردی جائے گی۔ عصر کی نمازسے مغرب تک جامع مسجد کھلی رہے گی۔ حکومت کی گائڈ لائن کے مطابق 9 بجے رات سے لاک ڈاون کا وقت شروع ہو جاتا ہے، اس لئے عشاء اور فجر میں وہی لوگ باجماعت نماز ادا کرسکیں گے، جو مسجد کے اندر ہیں۔
وائرس پھیلنے کے سبب ایک نمازی سے دوسرے نمازی کے درمیان سماجی فاصلہ (سوشل ڈیسٹنسنگ) بنائے رکھنا ضروری ہے۔ ساتھ ہی نماز ادا کرنے کے لئے جائے نماز ساتھ لےکر آنے کا حکم دیا گیا ہے۔ ساتھ ہی ساتھ تمام نمازیوں کو اپنے گھر سے وضو کرکے آنا ہوگا۔ جامع مسجد میں وضو کے لیے بنائے گئے حوض کے پانی کو پہلے ہی سکھا دیا گیا ہے، جبکہ جامع مسجد کے صرف اندرونی حصے میں ہی نماز ادا کی جائے گی۔ سماجی دوری بنائے رکھنے کے لئے نشانات لگا دیئے گئے ہیں۔ اندرونی حصہ میں نماز اور سماجی دوری کو دیکھتے ہوئے کافی کم تعداد میں ہی لوگ نماز ادا کر پائیں گے۔
ہفتہ، 4 جولائی 2020 کو دوپہر 12:30 بجے عام لوگوں کے لئے دہلی کی شاہجہانی جامع مسجد کھول دی جائے گی۔
واضح رہے کہ ملک میں کورونا بحران کے درمیان تمام عبادت گاہوں کو بند کرنے کا فیصلہ کیا گیا تھا۔ حکومت کی گائڈ لائن کے مطابق 8 جون کو عبادت گاہوں کو کھولنے کی اجازت دے دی گئی تھی۔ اسی میں مساجد کو بھی کھولنے کا فیصلہ کیا گیا تھا۔ تاہم شاہجہانی جامع مسجد کے امام سید احمد بخاری نے علمائے کرام سے تبادلہ خیال کے بعد کورونا وبا کے پیش نظر 8 جون کو مسجد نہ کھولنے کا فیصلہ کیا تھا۔ شاہی امام احمد بخاری نے احتیاط کے طور پر 11 جون کو بعد نماز مغرب 8 بجے سے 30 جون تک جامع مسجد میں عام لوگوں کے لئے مسجد کو بند کرنے کا اعلان کیا تھا۔ شاہی امام احمد بخاری نے مسجد کو بند کرنے کا اعلان کرتے ہوئے کہا تھا کہ علمائے کرام کی رائے اور عوام کے مشورے کے مطابق جامع مسجد کو بند کیا جا رہا ہے۔
سید احمد بخاری نے کہا تھا کہ علمائے کرام کی رائے کے مطابق شرعی عذر موجود ہے کہ ایسی بیماری پھیل رہی ہے، جس سے لوگوں کی ہلاکت کا خطرہ ہے، جان کی حفاظت شریعت کے لحاظ سے ضروری ہے، لیکن اب جامع مسجد کو احتیاط کے ساتھ کھولنے کا فیصلہ لیا گیا ہے۔ لہٰذا اب شاہجہانی جامع مسجد انتظامیہ نے یہ فیصلہ کیا ہے کہ مسجد کو کھول دی جائے۔ حالانکہ انتظامیہ نے مسجد کھولنے سے متعلق چند اصول وضواب تیار کئے ہیں، لہٰذا اس پر عمل کرنا ضروری ہوگا۔
سب سے پہلے پڑھیں نیوز18اردوپر اردو خبریں، اردو میں بریکینگ نیوز ۔ آج کی تازہ خبر، لائیو نیوز اپ ڈیٹ، پڑھیں سب سے بھروسہ مند اردو نیوز،نیوز18 اردو ڈاٹ کام پر ، جانیئے اپنی ریاست ملک وبیرون ملک اور بالخصوص مشرقی وسطیٰ ،انٹرٹینمنٹ، اسپورٹس، بزنس، ہیلتھ، تعلیم وروزگار سے متعلق تمام تفصیلات۔ نیوز18 اردو کو ٹویٹر ، فیس بک ، انسٹاگرام ،یو ٹیوب ، ڈیلی ہنٹ ، شیئر چاٹ اور کوایپ پر فالو کریں ۔
