Bihar Election 2020 : بی جے پی ۔ جے ڈی یو میں سیٹوں کی تقسیم پراتفاق رائے قائم ، اس فارمولہ پر لڑیں گے الیکشن

بہار میں ہونے والے اسمبلی انتخابات کو لے کر آخر کار این ڈی اے میں سیٹوں کی کی تقسیم کو لے کر بی جے پی اور جے ڈی یو کے درمیان اتفاق رائے قائم ہوگیا ہے ۔ ذرائع سے جو معلومات سامنے آرہی ہیں ، اس کے مطابق جے ڈی یو اور بی جے پی میں کئی راونڈ کی میراتھن میٹنگوں کے بعد لوک سبھا کی طرح ہی اسمبلی انتخابات میں برابر برابر سیٹوں پر الیکشن لڑنے کو لے کر دونوں پارٹیاں متفق ہوئی ہیں ۔ ذرائع کے مطابق جے ڈی یو اپنے کوٹہ سے مانجھی کی پارٹی ہم کو سیٹیں دیں گی ۔ لیکن ایل جے پی کی اب تک این ڈی اے میں سیٹوں کی تقسیم کو لے کر بات نہیں بن سکی ہے ۔

رام ولاس پاسوان کی ہارٹ سرجری کی وجہ سے ایل جے پی کی کل پارلیمانی بورڈ کی میٹنگ ملتوی ہوگئی تھی ۔ تنہا الیکشن لڑنے یا این ڈی اے کے ساتھ رہنے کو لے کر ایل جے پی کی پارلیمانی بورڈ کی آج ایک اہم میٹنگ ہوگی ۔ اس درمیان بی جے پی کی سینٹرل الیکشن کمیٹی کی آج شام میٹنگ بلائی گئی ہے ، جس میں امیدواروں کی فہرست پر مہر لگے گی ۔ این ڈی اے میں اتحاد کی صورت میں پہلے مرحلہ کی 71 سیٹوں میں سے آدھی سیٹوں پر بی جے پی نے امیدواروں کے ناموں کا اعلان کرنے کی تیاری کرلی ہے ۔

ادھر آر جے ڈی سے جو خبر سامنے آرہی ہے اس کے مطابق پارٹی اتوار کو کسی بھی وقت اپنے امیدواروں کے ناموں کا اعلان کرسکتی ہے ۔ دراصل بہار میں پہلے مرحلہ کا الیکشن 28 اکتوبر کو ہونا ہے ، جس میں اب کافی کم وقت باقی رہ گیا ہے اور ایسے میں سیٹوں کی تقسیم کو لے کر صورتحال واضح ہوجانے کے بعد اب لالو پرساد کی پارٹی اپنے پہلے مرحلہ کے امیدواروں کی فہرست جاری کرسکتی ہے ۔

پارٹی سے جو معلومات سامنے آرہی ہیں ، اس کے مطابق کسی بھی وقت پارٹی امیدواروں کی فہرست سامنے آسکتی ہے ۔ اس کے ساتھ ہی پارٹی کے ذرئع نے بتایا ہے کہ بہار الیکشن کو لے کر مرحلہ وار طریقہ سے امیدواروں کے نام کا اعلان کیا جائے گا تاکہ ان کو اپنے علاقہ میں تشہیری مہم چلانے کیلئے مناسب وقت مل سکے ۔