ایک طرفہ پیار میں پاگل سرپھرے عاشق نے شادی شادہ خاتون کے ساتھ کی ایسی خوفناک حرکت ، مچ گیا کہرام

بہار کے مدھوبنی ضلع میں مبینہ معاشقہ میں دوہرے قتل کا ایک سنسنی خیز معاملہ سامنے آیا ہے ۔ یہ واقعہ مدھونی ضلع کے مدھے پورہ تھانہ حلقہ میں پیش آیا ۔ اتوار کی دوپہر کو مدھے پورہ تھانہ کے بھیٹھ بھگوان پور گاوں میں اس وقت کہرام مچ گیا جب 28 سالہ شادی شدہ خاتون پر چاقو سے حملہ کرکے اس کا قتل کردیا گیا ۔ موصولہ اطلاعات کے مطابق خاتون اپنے بچوں کو کھانا کھلارہی تھی تبھی ارون کمار چوپال نام کے ایک 30 سالہ شخص نے خاتون پر چاقو سے حملہ کرکے اس کا قتل کردیا ۔

اس سنسنی خیز واقعہ کے بعد مشتعل اہل خانہ اور مقامی لوگوں نے نوجوان کی جم کر پٹائی کرنے کے بعد اس کو بے ہوشی کی حالت میں کملا بلان ندی میں پھینک دیا ۔ پولیس کے جائے واقعہ پر پہنچنے کے بعد ندی سے نوجوان کی لاش برآمد ہوئی ۔ اندیشہ ظاہر کیا جارہا ہے کہ ندی میں دم گھٹنے سے نوجوان کی موت ہوگئی ۔ ڈی ایس پی آشیش آنند کے مطابق فی الحال پولیس نے دونوں لاشوں کو پوسٹ مارٹم کیلئے بھیج دیا ہے اور معاملہ کی تفتیش شروع کردی ہے ۔

مقتولہ خاتون بھارتی دیوی کی شادی دربھنگہ ضلع کے گھنشیام پور تھانہ حلقہ میں واقع پالی گاوں کے رہنے والے کرشن کمار کے ساتھ ہوئی تھی ۔ مقتولہ خاتون کا شوہر دہلی میں نوکری کرتا ہے اور اس کے دو بچے بھی ہیں ۔ ان دنوں وہ اپنے دونوں بچوں کے ساتھ مدھے پورہ تھانہ حلقہ میں واقع بھیٹھ بھگوان پور گاوں میں اپنے مائیکے آئی ہوئی تھی ، جہاں اس کا قتل کردیا گیا ۔ بتایا جارہا ہے کہ ملزم نوجوان بھارتی دیوی سے ایک طرفہ پیار کرتا تھا ۔ یہ بھی بتایا جارہا ہے کہ کئی مرتبہ وہ بھارتی دیوی سے ملنے اس کے سسرال بھی گیا تھا ۔

مقامی لوگوں کا کہنا ہے کہ کسی نہ کسی بہانے یہ نوجوان شادی شدہ بھارتی دیوی سے بات چیت کی کوشش کرتا رہتا تھا ۔ اتوار کو بھی وہ بھارتی دیوی سے ملنے کیلئے اس کے مائیکے پہنچ گیا تھا ۔ بتایا جارہا ہے کہ خاتون نے جب بات چیت سے منع کردیا تو سرپھرے عاشق نے چاقو سے حملہ کرکے اس کی جان لے لی ۔ ملزم نوجوان ارون کمار چوپال مدھوبنی ضلع کے بھیجا تھانہ حلقہ میں واقع پربل پور گاوں کا رہنے والا تھا ۔ ارون کمار کی لاش کملا بلان ندی سے برآمد ہوئی ہے ۔