امفان طوفان: وزیر اعظم مودی نے مغربی بنگال کو ایک ہزار کروڑ روپئے دینے کا اعلان کیا

کلکتہ۔ وزیرا عظم نریندر مودی نے آج مغربی بنگال کے عوام کو یقین دلاتے ہوئے کہا ہے کہ مصیبت کی اس گھڑی میں پورا ملک ان کے ساتھ ہے اور مرکزی حکومت ”امفان طوفان“ سے ہونے والی تباہی سے بنگال کو نکالنے اور بنگال کی از سر نو بازآبادکار ی کیلئے بنگال حکومت کی ہر ممکن مدد کرنے کو تیار ہے۔ وزیرا عظم مودی نے کہا کہ ابتدائی طور پر مرکزی حکومت نے ایک ہزار کروڑ روپے دینے کا فیصلہ کیا ہے۔

ممتا بنرجی کے ساتھ امفان طوفان سے ہونے والی تباہیوں کا فضائی جائزہ لینے کے بعد نامہ نگاروں سے خطاب کرتے ہوئے وزیر اعظم مودی نے کہا کہ امفان طوفان نے بنگال میں بڑے پیمانے پر تباہی مچائی ہے اور لاکھوں کروڑ روپے کے نقصانات ہوئے ہیں۔ وزیرا عظم مودی نے کہا کہ بنگال کو اس مصیبت سے نکالنے کیلئے مرکز اور ریاستی حکومت مل کر کام کریں گے۔ انہوں نے کہا کہ بنگال کو جلد سے جلد دوبارہ کھڑا کرنے اور ترقی کی راہ پر گامزن کرنے کیلئے جلد ہی مرکزی حکومت کی ایک ٹیم بنگال کا دورہ کرے گی اور زراعت، بجلی، کمیونیکیشن، سڑک، مکانات اور دیگر نقصانات کا جائزہ لینے کے بعد پورا خاکہ بنائے گی۔ بازآباد کاری کیلئے موثر یوجنا بنائی جائے گی۔ وزیر اعظم مودی نے کہا کہ بنگال کو از سرنو کھڑا کرنے کیلئے جو بھی ضرورت ہوگی اس کو پورا کرنے کیلئے ہم کھڑے رہیں گے۔ وزیرا عظم مودی نے کہاکہ فوری طور پر ہم نے بنگال حکومت کو ایک ہزار کروڑ روپے دینے کا فیصلہ کیا ہے۔تاکہ جلد سے جلد بازآبادکاری کا کام شروع کیا جاسکے۔

#WATCH Dealing with #COVID19 requires social distancing whereas battling the #AmphanCyclone requires people to move to safer areas. Despite these contradictions, West Bengal under leadership of Mamata ji is fighting well. We are with them in these adverse times: PM pic.twitter.com/pBxjWTlZTq

— ANI (@ANI) May 22, 2020

وزیر اعظم مودی نے کہا کہ طوفان میں جن لوگوں کی موت ہوگئی ہے ان کے ورثاء کو دو۔دو لاکھ روپے وزیر اعظم ریلیف فنڈ سے دیا جائے گا۔اس کے علاوہ زخمیوں کے علاج کیلئے50ہزار روپے تک کی مدد کرنے کا انتظام کریں گے۔ وزیراعظم مودی نے کہا کہ پوری دنیا اس وقت کورونا وائرس کے بحران سے دو چار ہے اور اس سے جیتنے کی کوشش کررہی ہے۔ہندستان بھی کورونا کے خلاف جنگ لڑرہا ہے۔وزیر اعظم نے کہا کہ کورونا وائرس اور طوفان سے نمٹنے کا منتر جداگانہ ہے۔کورونا وائرس کا منتر یہ ہے کہ جو جہاں ہے وہیں رہے۔ اور معاشرتی فاصلے کو قائم رکھے۔جب کہ طوفان کا تقاضا ہے کہ جلد سے جلد لوگوں کو محفوظ مقامات پرمنتقل کیا جائے۔ دو الگ قسم کی لڑائیاں بنگال کو لڑنی پڑرہی ہیں۔

وزیر اعظم مودی نے راجہ رام رائے موہن کو یاد کرتے ہوئے کہا کہ آج ان کی جینتی ہے اور بنگال کی سرزمین قابل فخر ہے۔ وہ راجہ رام موہن رائے کی دھرتی ہے۔ہمارے لئے فخر کی بات ہے۔ہم امید کرتے ہیں کہ راجہ رام موہن رائے کا آشیرواد ہمیں حاصل رہے گا اور ہم سب مل کر بنگال کی ترقی کیلئے کام کریں گے اور یہی ان کیلئے سب سے بڑی خراج عقیدت ہوگی۔