مغربی بنگال میں دوسرے مرحلہ کی ووٹنگ جاری ، دو گھٹنے میں الیکشن کمیشن کو ملی 200 شکایتیں

کولکاتہ : مغربی بنگال اسمبلی الیکشن کے دوسرے مرحلے کے لئے سخت سیکورٹی بندوبست کے دوران ووٹنگ جاری ہے ۔ ووٹنگ شروع ہونے کے بعد کچھ مقامات پر تشدد کے اکا دکا واقعات کی اطلاعات ہیں۔ مالدہ ضلع میں انگلش بازار اسمبلی سیٹ کے بوتھ نمبر 163 میں فرضی ووٹنگ ہونے کی بھی رپورٹ ہے۔ ووٹنگ شروع ہونے کے دو گھنٹہ کے اندر الیکشن کمیشن کو مختلف واقعات کی کم از کم 200 شکایتیں موصول ہوئی ہیں۔
خیال رہے کہ اس مرحلے میں مغربی بنگال کے سات اضلاع کی 56 اسمبلی سیٹوں پر ووٹنگ ہورہی ہے۔ یہاں اصل مقابلہ ترنمول کانگریس، کانگریس۔بایاں محاذ اتحاد، بی جے پی اور گورکھاجن مکتی مورچہ کے مابین ہے۔ اس مرحلہ کے اہم امیدواروں میں ترنمول کانگریس سے فٹبال کھلاڑی بائچنگ بھوٹیا ہیں ، جنہیں سی پی ایم کے اشوک بھٹاچاریہ کے خلاف اتارا گیا ہے۔