لاک ڈاون کے ساتھ طوفان "امفان" نے مغربی بنگال میں عید کی خوشیوں کو کیا پھیکا 

ایک ماہ کے روزے کے بعد عید کی تیاریاں خاص ہوتی ہیں ، لیکن کورونا واٸرس سے بچاٶ کیلئے ملک بھر میں جاری لاک ڈاٶن نے عید کا رنگ پھیکا کردیا ہے ۔ عوامی جان کے تحفظ کے اگے ہر خوشی پھیکی پڑ گٸی ہے ۔ رمضان کا بابرکت مہینہ لیکن مسجدیں ویران ، سڑکیں سنسان ، ہر کوٸی حیران و پریشان کے آخر ایسا کیسے ہوگیا کہ جو نہ کبھی دیکھا نہ سنا ۔ مساجد میں تالے لگے ہیں ، آنکھیں اشکبار ہیں ، لوگ روزہ وعبادات تو کررہے ہیں ، لیکن ہر ایک کی زبان پر بس یہی ایک دعا ہے کہ دنیا کو اس بیماری سے نجات ملے ۔

رمضان المبارک کا مہینہ ایک ایسا مقدس مہینہ ہے ، جس کا انتظار سال بھر ہوتا ہے ۔ ایک ماہ کے روزے کے بدلے انعام میں ملنے والے عید کا تہوار دستک دینے والا ہے ، لیکن اس سال عید میں بھی بیشتر لوگوں کے پاس نہ نٸے کپڑے ہوں گے اور نہ  دیگر چیزیں ۔ عید کے لٸے سجنے والا بازار بھی ویران ہے ۔

حالانکہ مغربی بنگال میں 21 مٸی سے نٸی گایٸڈ لاٸن کے ساتھ دکانیں کھلنے کا اعلان کیا گیا تھا ، لیکن طوفان امفان نے اس کوشش کو بھی ناکام بنا دیا ۔ طوفان سے تباہ ہوئے کولکاتہ کا بھی حال ایسا ہے کہ عید کی خریداری کیلئے لوگ بازار تو آرہے ہیں ، لیکن وہاں انہیں سناٹا ہی نظر آرہا ہے ۔ خواتین کو بازاروں میں گھومتے ہوٸے تو دیکھا گیا ، لیکن وہ مایوس ہی نظر آئیں ۔  جبکہ لاک ڈاٶن سے معاشی پریشانی کے شکار افراد طوفان کی تباہی سے بھی پریشان ہیں ۔ کٸی دکانوں و مکانوں کو طوفان امفان سے نقصان پہنچا ہے ۔ کولکاتہ میں درخت گرنے سے ایک بڑا علاقہ متاثر ہوا ہے ۔