بنگال کی سیاست میں انٹری کیلئے اسد الدین اویسی نے کولکاتہ کے اس مسلم علاقہ کا کیا انتخاب ، جانئے کیوں

بنگال کی سیاست میں اسد الدین اویسی بھی اپنا جادو دکھائیں گے۔ آئندہ ہفتہ اسد الدین اویسی کولکاتہ میں پہلا عوامی جلسہ منعقد کرنے جارہے ہیں ۔ اہم بات یہ ہے کہ اسد الدین اویسی فرفرہ شریف کے بعد اس بار مٹیا برج میں پہلا عوامی جلسہ منعقد کریں گے ۔

بنگال اسمبلی الیکشن میں شامل ہونے کے اعلان کے ساتھ اسد الدین اویسی نے فرفرہ شریف کے پیرزادہ عباس صدیقی سے ملاقات کی تھی اور عباس صدیقی کے ساتھ الیکشن لڑنے کا اعلان کیا تھا ۔ اسد الدین اویسی وعباس صدیقی کی ملاقات کے بعد ریاست کے مسلم ووٹ بینک کے بکھراؤ کا اندیشہ ظاہر کیا جارہا ہے۔ یہی وجہ ہے کہ برسراقتدار جماعت ترنمول کانگریس نے بڑی تعداد میں اے ائی ایم ائی ایم کے لیڈران کو پارٹی میں شامل کرکے ریاست میں ایم آئی ایم کا اثر نہ ہونے اور مسلم ووٹ بینک پر اپنا اثر برقرار رکھنے کا دعوی کیا تھا ۔

تاہم ریاست کی سیاست میں موجودگی درج کرانے اور مسلم ووٹروں کو متوجہ کرنے کے لئے اسد الدین اویسی نے کولکاتہ میں مسلمانوں کے گڑھ سمجھے جانے والے مٹیابرج علاقے سے اپنی سیاسی سرگرمیاں شروع کرنے کا فیصلہ کیا ہے۔ ذرائع سے ملی خبروں کے مطابق اسد الدین اویسی کولکاتہ کے مٹيابرج میں اے ائی ایم ائی ایم کی جانب سے منعقد ہونے والے عوامی جلسے میں شرکت کریں گے ۔ یعنی یہاں سے اسد الدین اویسی مسلمانوں کو متحد کرنے اور ان پر بھروسہ ظاہر کرنے کی اپیل کریں گے ۔

منعقد ہونے والے پروگرام کو گرچہ خفیہ رکھا گیا ہے ، لیکن جیسے جیسے جلسے کی تیاریاں شروع ہوں گی ، لوگوں کا جوش و خروش بھی سامنے آئے گا ۔ لیکن اس جلسے میں اسد الدین اویسی کو کن کن سیاسی جماعتوں کا ساتھ ملے گا ، یہ دیکھنا اہم ہے ۔