راجیہ سبھا کی 19سیٹوں پر انتخابات آج ، الیکشن کمیشن نے کورونا کو لے کر کئے خاص انتظامات

ملک کی آٹھ ریاستوں میں راجیہ سبھا کی 19 سیٹوں پر جمعہ کو الیکشن ہوں گے ۔ گجرات ، مدھیہ پردیش اور راجستھان میں بی جے پی اور کانگریس کے درمیان نزدیکی مقابلہ ہونے کا امکان ہے ۔ کورونا وائرس کی وجہ سے 18 سیٹوں پر الیکشن کو ملتوی کردیا گیا تھا ۔ بعد میں الیکشن کمیشن نے کرناٹک سے چار سیٹوں اور میزورم و اروناچل پردیش سے ایک ایک سیٹ کیلئے الیکشن کا اعلان کیا تھا ۔ الیکشن کمیشن نے کورونا وائرس کو دیکھتے ہوئے خاص انتظامات کئے ہیں ۔

راجیہ سبھا کی 19 سیٹوں میں آندھرا پردیش اور گجرات میں چار چار ، مدھیہ پردیش اور راجستھان میں تین تین ، جھارکھنڈ میں دو اور منی پور ، میروزم اور میگھالیہ میں ایک ایک سیٹ پر انتخابات ہوں گے ۔  منی پور میں حکمراں اتحاد کے نو اراکین کے استعفی کی وجہ سے وہاں الیکشن دلچسپ ہونے کا امکان ہے ۔ بی جے پی نے لیسیمبا سانا جا اوبا کو اور کانگریس نے ٹی منگی بابو کو امیدوار بنایا ہے ۔

کرناٹک میں چار سیٹوں پر سابق وزیر اعظم ایچ ڈی دیوے گوڑا ، کانگریس کے سینئر لیڈر ملک ارجن کھڑگے ، بی جے پی کے ارنا کڈاڈی اور اشوک گستی کو پہلے ہی بلامقابلہ کامیاب قرار دیا جاچکا ہے ۔ اروناچل پردیش سے راجیہ سبھا کی واحد سیٹ سے بی جے پی امیدوار نبام ریبیا کی بلا مقابلہ جیت کا اعلان کیا جاچکا ہے ۔ الیکشن کمیشن نے کہا ہے کہ 19 جون کی شام میں ہی سبھی 19 سیٹوں کیلئے ووٹوں کی گنتی ہوگی ۔

کورونا وائرس کو لے کر خاص انتظامات

کورونا وائرس کے پیش نظر الیکشن کمیشن نے ووٹنگ کیلئے مکمل انتظامات کئے ہیں ۔ ہر ایک ووٹر ( ممبر اسمبلی ) کے درجہ حرارت کی جانچ کی جائے گی اور سماجی دوری کے ضابطہ پر عمل کیا جائے گا ۔ گجرات میں مقابلہ دلچسپ ہونے کی امید ہے کیونکہ حکمراں بی جے پی اور کانگریس دونوں میں کسی کے پاس بھی اپنے دم پر امیدواروں کو جیت دلانے کیلئے اسمبلی میں مطلوبہ تعداد نہیں ہے ۔