کانگریس میں نہیں تھم رہی ہے تلخی، کپل سبل کے نئے ٹوئٹ سےکانگریس میں’گھمسان‘ شروع ہونے کا امکان

نئی دہلی: کانگریس ورکنگ کمیٹی کے اجلاس میں سونیا گاندھی کے دوبارہ عبوری صدر منتخب کئے جانے کے بعد یہ خیال کیا جارہا تھا کہ سینئر رہنماؤں کے مابین تلخی ختم ہوگئی ہے، لیکن پارٹی کے سینئر رہنما اور سابق مرکزی وزیرکپل سبل کے ٹوئٹ سے پتہ چلتا ہے کہ ’گھمسان‘ ابھی باقی ہے۔ پارٹی کے سابق صدر راہل گاندھی کے پیرکے روز میٹنگ میں بیان کے بعد ٹوئٹ کرنے والے اور ملک کے سینئرترین وکیل میں سے ایک کپل سبل کے آج کے ٹوئٹ سے قیاس آرائیوں کا بازار گرم ہوگیا ہے۔ کپل سبل نے ٹوئٹ میں لکھا ’’یہ کسی عہدہ کی بات نہیں ہے۔ یہ میرے ملک کی بات ہے، جو سب سے زیادہ اہم ہے‘‘۔

It’s not about a post
It’s about my country which matters most

— Kapil Sibal (@KapilSibal) August 25, 2020

راہل گاندھی کی ناراضگی کی اطلاع کے بعد بھی پیرکو میٹنگ میں کپل سبل نے ٹوئٹ کیا تھا، لیکن بعد میں سینئر ایڈوکیٹ کپل سبل نے یہ کہتے ہوئے ٹوئٹ کو ہٹا دیا تھا کہ راہل گاندھی نے انہیں بتایا تھا کہ انہوں نے ایسا کچھ نہیں کہا ہے۔ قابل ذکر ہےکہ پیرکو ہونے والی اس میٹنگ سے قبل پارٹی کے 23 سینئر رہنماؤں نے جن میں راجیہ سبھا میں حزب اختلاف کے رہنما غلام نبی آزاد بھی شامل تھے، نے تنظیم میں تبدیلی کے لئے سونیا گاندھی کو خط لکھا تھا۔ اس خط کے بعد سے پارٹی میں ہلچل مچی ہوئی ہے۔

کانگریس ورکنگ کمیٹی کے اجلاس میں سونیا گاندھی کے دوبارہ عبوری صدر منتخب کئے جانے کے بعد یہ خیال کیا جارہا تھا کہ سینئر رہنماؤں کے مابین تلخی ختم ہوگئی ہے، لیکن پارٹی کے سینئر رہنما اور سابق مرکزی وزیرکپل سبل کے ٹوئٹ سے پتہ چلتا ہے کہ ’گھمسان‘ ابھی باقی ہے۔

پیر کے روز کانگریس ورکنگ کمیٹی کی میٹنگ تقریباً 7 گھنٹے کے بعد ختم ہوئی تھی۔ میٹنگ میں یہ فیصلہ لیا گیا ہے کہ سونیا گاندھی (Sonia Gandhi) کانگریس کی (Congress Interim President) عبوری صدر بنی رہیں گی۔ ذرائع نے بتایا کہ اگلے 6 ماہ کے اندر پارٹی کو نیا صدر منتخب کرنا ہوگا۔ ذرائع سے اطلاع ملی ہے کہ سونیا گاندھی پر کام کا بوجھ کم کرنے کے لئے کچھ پارٹی لیڈر ان کے ساتھ منسلک کئے جائیں گے۔ میٹنگ میں کانگریس ورکنگ کمیٹی نے ایک سال کا وقت دینے کی بات کہی، لیکن راہل گاندھی اور پرینکا گاندھی نے 6 ماہ میں نئے صدر کا عمل شروع کرنے کی بات کہی۔ اپنی تقریرکے دوران راہل گاندھی نے جذباتی انداز میں کہا، ’پورے حادثہ (سونیا گاندھی کی بیماری کے وقت سینئر لیڈروں کے ذریعہ لکھے گئے خط اور جواب دینے کے لئے ریمائنڈر بھیجنے) سے میں دکھی ہوا، آخر میں بیٹا ہوں’۔