ٹی آر پی اسکیم : CNN-NEWS18 کے ساتھ ہوئی سازش ، BARC کا سابق سی ای او ذمہ دار

ٹی آر پی اسکیم میں اب ایک بڑا انکشاف ہوا ہے ۔ براڈ کاسٹ آڈینس ریسرچ کونسل (BARC) نے ایک پریس بیان جاری کرکے خود اس کی جانکاری دی ہے ۔ بتایا گیا ہے کہ پورے ٹی آر پی اسکیم کیلئے بارک کے سابق سی ای او پارتھو داس گپتا ذمہ دار تھے ۔ انہوں نے ایک نیوز چینل کو آگے بڑھانے کیلئے CNN-News18 کے ساتھ بھی سازش کی ۔ اس چینل کی لوگوں تک رسائی بڑھانے کیلئے CNN-News18 کے ساتھ دھوکہ کیا گیا ۔ بارک خود بھی اس جانچ کا حصہ رہا ہے ۔

غور طلب ہے کہ ممبئی پولیس کی کرائم برانچ نے جمعرات کو پارتھو کو پونے سے گرفتار کیا ہے ۔ ٹی وی چینلوں کے ذریعہ ٹی آر پی سے چھیڑ چھاڑ کرنے کے معاملہ میں گرفتار ہونے والے ملزم پارتھو داس گپتا 15 ویں شخص ہیں ۔

ایک افسر نے بتایا کہ انہیں پونے ضلع کے راج گڑھ پولیس پولیس تھانہ حلقہ سے سی آئی یو نے گرفتار کیا ہے ۔ اس سے پہلے سی آئی یو نے بارک کے سابق سی ای او رام گڑھیا کو اس معاملہ میں گرفتار کیا تھا ۔

بارک نے درج کرائی تھی شکایت

ریٹنگ ایجنسی بارک نے کچھ چینلوں کے ذریعہ ٹی آر پی سے چھیڑ چھاڑ کرنے کے سلسلہ میں شکایت درج کرائی تھی ، جس کے بعد ممبئی پولیس نے جانچ شروع کردی ۔ کچھ گھروں میں ناظرین کی تعداد کا پتہ لگا کر ٹی آر پی طے کی جاتی ہے اور ناظرین کی تعداد کے اعداد و شمار سے چینلس ایڈورٹائزرس کو راغب کرتے ہیں ۔ ایسے الزامات بھی لگے تھے کہ ان گھروں میں کچھ کو رشوت دی جاتی تھی کہ وہ کچھ خاص چینلوں پر جائیں تاکہ ان کی ٹی آر پی بڑھ سکے ۔