کیجریوال کا جنگ اور جیٹلی پر نشانہ، ایل جی کی پہلے اپنی سانس اٹکی ہوئی تھی، اب ان کے آقا پھنسے ہوئے ہیں

نئی دہلی : ڈی ڈی سی اے معاملے پر دہلی کے وزیر اعلی اروند کیجریوال نے ایک بار پھر ارون جیٹلی، مرکزی حکومت اور لیفٹیننٹ گورنر نجیب جنگ پر حملہ بولا ہے۔ خاص طور پر ڈی ڈی سی اے سے متعلق تشکیل شدہ کمیشن کو ایل جی کی جانب سے غیر قانونی بتائے جانے کی خبر پر کیجریوال نے نجیب جنگ کو نشانے پر لیا ہے۔

لیفٹیننٹ گورنر کے مرکز کو خط لکھنے کے معاملے پر کیجریوال نے کہا کہ اگر ایل جی منتخبہ حکومت کے خلاف ذرائع کے ذریعے خبر نشر کروا رہے ہیں ، تو یہ بڑی سنگین بات ہے۔ جیٹلی ایل جی کے ذریعے کمیشن کو نل اینڈ وائيڈ کروا رہے ہیں۔ یہ سیاست ہے۔ حکومت کو غیر مستحکم کرنے کی کوشش ہے۔ کرپشن کو بچانے کی کوشش ہے۔ بی جے پی کے مارک درشک منڈل نے بہت اچھا قدم اٹھایا ہے۔ ٹرانسپورٹ معاملے میں خود ایل جی پھنسے ہوئے ہیں۔

وزیر اعلی نے کہا کہ ہمیں ان کی سی بی آئی، ڈی آر آئی اور ای ڈی سے ڈر نہیں لگتا، مگر انہیں ڈی ڈی سی اے سے ڈر لگتا ہے۔ دال پوری کی پوری کالی ہے۔ ایل جی کا غلط استعمال کرنا بند کریں۔ تین موضوعات کے علاوہ ایل جی کے پاس ہر فائل بھیجنے کی ضرورت نہیں ہے۔ ایل جی کی پہلے اپنی سانس اٹکی ہوئی تھی، اب ان کے آقا پھنسے ہوئے ہیں۔

کیجریوال نے کہا کہ راج ناتھ سنگھ جی جیٹلی جی کو بچانے کی کوشش نہیں کریں گے۔ وزارت داخلہ راج ناتھ سنگھ کے ما تحت ہے وہ اس کو نل اینڈ وائڈ نہیں کریں گے۔ ارون جیٹلی تحقیقات سے گھبرا کیوں رہے ہیں؟۔