سوامی پرساد موریہ نے چھوڑی بی ایس پی ، مایاوتی پر ٹکٹ فروخت کرنے کا لگایا الزام

نئی دہلی۔ بہوجن سماج پارٹی (بی ایس پی) کے قد آور لیڈر اور اسمبلی میں حزب اختلاف کے لیڈر سوامی پرساد موریہ نے الیکشن سے پہلے مایاوتی کو زبردست جھٹکا دیتے ہوئے بدھ کو پارٹی سے استعفی دے دیا۔

پریس کانفرنس میں استعفی کا اعلان کرتے ہوئے موریہ نے بی ایس پی سپریمو مایاوتی پر سنگین الزام لگاتے ہوئے کہا کہ انہوں نے امبیڈکر کے خوابوں کو بیچا ہے۔ موریا نے مایاوتی پر پارٹی میں ٹکٹ فروخت کرنے کا بھی الزام لگایا۔ اسی کے ساتھ ہی انہوں نے کہا کہ مایاوتی مجھے پروگراموں میں جانے سے روکتی ہیں۔ سوامی پرساد یوپی میں اپوزیشن لیڈر بھی ہیں۔

موریہ نے کہا کہ مایاوتی آئندہ انتخابات کے لئے ٹکٹ فروخت کر رہی ہیں۔ یہ آنجہانی کانشی رام اور امبیڈکر جی کی توہین ہے۔ بی ایس پی نیلامی کی مارکیٹ بن گئی ہے۔ مایاوتی دلت نہیں دولت کی بیٹی ہیں۔ کانشی رام نے جو نعرہ دیا تھا، لالچ موہ میں آکر نعرے کو تبدیل کرنے کا کام کیا گیا۔ كانشی رام کے راستے سے بھٹک گئی ہیں مایاوتی۔ انہوں نے امبیڈکر جی کے خیالات کا قتل کیا ہے۔ بی ایس پی کے کارکن مایوس ہیں، اس پارٹی میں دلتوں کے لئے جگہ نہیں رہ گئی ہے۔

موریہ نے کہا کہ 2012 اسمبلی انتخابات میں ہم ہارتے نہیں کیونکہ حکومت مخالف لہر نہیں تھی۔ 2014 انتخابات میں امیدوار پیسے لے کر اعلان کئے گئے تھے اسی لئے ہارے۔ گزشتہ انتخابات سے مایاوتی نے سبق نہیں لیا ہے۔ کتنی بار ٹکٹ فروخت کیا جائے گا ابھی اس کی حد نہیں ہے۔

وہیں موریہ کے باغی ہوتے ہوئے سماج وادی پارٹی کے اعظم خاں نے موقع لپكتے ہوئے ان کی جم کر تعریف کر ڈالی۔ اعظم نے کہا کہ موریہ جی کے ایک  انسان اور سیاستداں کے طور پر ہم ہمیشہ ان کی تعریف کرتے رہے ہیں۔ ہم ہمیشہ کہتے رہے ہیں کہ ان کے جیسا شخص وہاں ٹھیک نہیں ہے۔

جس جگہ پر موریہ میڈیا کے سامنے بیان دے رہے تھے، وہاں اعظم خاں بھی موجود تھے۔ موریہ کا بیان ختم ہوتے ہوئے انہوں نے موریہ سے بات بھی کی۔ اس کے علاوہ شیو پال یادو بھی ان سے بات کرتے نظر آئے۔