حکومت اور کسانوں کی میٹنگ بے نتیجہ ، 8 جنوری کو اگلی بات چیت

حکومت اور کسانوں کے درمیان ساتویں دور کی بات چیت ختم ہوگئی ہے ۔ دونوں فریقوں کے درمیان تین گھنٹوں تک چلی یہ میٹنگ بے نتیجہ رہی ۔ اب اگلے دور کی بات چیت 8 جنوری کو ہوگی ۔ کسان تنظیموں کے نمائندے قانون کو رد کرنے کے مطالبہ پر بضد ہیں ۔ حالانکہ حکومت کی جانب سے کہا گیا ہے کہ وہ قوانین کو واپس نہیں لے گی ، مگر وہ ترمیم کیلئے تیار ہے ۔ ذرائع نے بتایا کہ تقریبا ایک گھنٹے تک چلی میٹنگ کے بعد فریقین نے لنچ کیلئے وقفہ لیا ۔ انہوں نے بتایا کہ سرکار ان قوانین کو رد نہیں کرنے کے موقف پر قائم ہے اور سمجھا جاتا ہے کہ اس نے اس موضوع پر تبادلہ خیال کیلئے کمیٹی تشکیل دینے کا مشورہ دیا ہے ۔

میٹنگ کے بعد زراعت کے مرکزی وزیر نریندر سنگھ تومر نے کہا کہ ہم چاہتے ہیں کہ کسان تنظیمیں تینوں قوانین پر تبادلہ خیال کریں ۔ ہم کسی حل تک نہیں پہنچ سکے ، کیونکہ کسان تنظیمیں قوانین کو رد کرنے پر بضد ہیں ۔

Looking at today's discussion, I hope that we will have a meaningful discussion during our next meeting and we will come to a conclusion: Union Agriculture Minister Narendra Singh Tomar https://t.co/qI6PmeHM07

— ANI (@ANI) January 4, 2021

بھارتیہ کسان یونین کے یودھویر سنگھ نے کہا کہ وزیر چاہتے تھے کہ ہم قانون پر نکتہ وار گفتگو کریں ۔ ہم نے اس کو خارج کردیا اور کہا کہ گفتگو کا کوئی مطلب نہیں کیونکہ ہم قوانین کو پوری طرح رد کرنے کا مطالبہ کررہے ہیں ۔ سرکار کا ہمیں ترمیم کی جانب لے جانے کا ارادہ ہے ، لیکن ہم اس کو قبول نہیں کریں گے ۔

اناج کے خریداری نظام سے وابستہ ایم ایس پی کی قانونی ضمانت دینے کے کسانوں کے مطالبہ پر بھی اختلافات قائم ہیں ۔ کسان تنظیمیوں کے نمائندے اپنے لئے خود کھانا لے کر آئے تھے ۔ کھانے کے وقفہ کے دوران لنگر لگا ۔ حالانکہ 30 دسمبر کی طرح آج مرکزی لیڈر لنگر میں شامل نہیں ہوئے اور اس وقفہ کے دوران الگ سے گفتگو کرتے رہے ۔

زراعت کے مرکزی وزیر نریندر سنگھ تومر ، ریلوے کے وزیر پیوش گوئل اور کامرس کے وزیر مملکت سوم پرکاش نے وگیان بھون میں 40 کسان یونینوں کے نمائندوں کے ساتھ بات چیت شروع کی ۔ ذرائع نے بتایا کہ موجودہ احتجاج کے دوران جان گنوانے والے کسانوں کو خراج عقیدت پیش کرنے کے ساتھ میٹنگ شروع ہوئی ۔