میرٹھ: اس انداز میں میڈیکل کالج میں شروع ہوئی او پی ڈی، 6 فٹ دور سے ڈاکٹرکررہے ہیں مریضوں کا علاج

میرٹھ: طویل وقفے کے بعد میرٹھ میڈیکل کالج میں باضابطہ طور پر او پی ڈی کی شروعات ہو گئی ہے، لیکن کورونا انفیکشن کے خطرے اور احتیاطی اقدامات کے پیش نظر میڈیکل کالج میں مریضوں کے پرچہ بنوانے سے لے کر ڈاکٹروں کے مریضوں کو دیکھنے تک کے انداز اور طریقے میں تبدیلی آ گئی ہے، اس انداز سے ڈاکٹری علاج پر اب کئی مریض بے اطمینانی بھی ظاہر کر رہے ہیں۔

لمبے وقت کے بعد میرٹھ کے لالا لاجپت رائے میڈیکل کالج میں باضابطہ طور پر او پی ڈی کی شروعات ہوگئی ہے اور اسی کے ساتھ ہی مریضوں کو دیکھنے کے طریقہ کار میں بھی تبدیلی کی گئی ہے، پرچہ بنوانے کی قطار میں لگے مریضوں اور ان کے تیمارداروں کو دوری بنا کرکھڑے ہونے کی ہدایات کی جا رہی ہے تو وہیں او پی ڈی میں ڈاکٹرکھڑکی سے ہی مریضوں کو دیکھ کر نسخے لکھ رہے ہیں۔ کورونا انفیکشن سے بچاؤ کے پیش نظر میڈیکل میں بدلے ہوئے اس ماحول سے جہاں کچھ مریض مطمئن نظر آ رہے ہیں۔ وہیں کئی مریض ڈاکٹروں کی کم تعداد اور بغیر جانچ کے حال پوچھ کر دوا لکھ دیئے جانے کے طریقے پر ناراضگی بھی ظاہر کر رہے ہیں۔

وہیں میڈیکل میں بدلے ہوئے اس نظام کو میڈیکل کالج کے پرنسپل وقت کی ضرورت قرار دیتے ہوئے آنے والے دنوں میں انتظامات کو اور بہتر بنانے کی یقین دھانی کرا رہے ہیں، میڈیکل کالج کے پرنسپل ڈاکٹر گیانيندر کمار کا کہنا ہے کہ ان حلات میں احتیاط برتتے ہوئے مریضوں کے علاج کی شروعات کی گئی ہے۔ ڈاکٹروں کی تعداد ابھی کچھ کم ضرور ہے، لیکن آنے والے دنوں اس کمی کو بھی دور کر لیا جائے گا۔ سرکاری گائیڈ لائن کے مطابق احتیاطی تدابیر پر عمل کرتے ہوئے میڈیکل کالج میں اؤ پی ڈی کی شروعات تو ہو گئی ہے، لیکن تمام سہولیات کی دستیابی کو یقینی بنانے میں ابھی وقت لگ سکتا ہے۔