لکھنئو: مشہور و معروف شاعرہ محترمہ نسیم نکہت کا انتقال، ادبی دنیا سوگوار

چاہنے والے ہمیں چھوڑ گئے سب تنہا
زندگی کٹتی نہیں ہم سے مگر اب تنہا۔

لکھنئو کی بین الاقوامی شہرت یافتہ شاعرہ محترمہ نسیم نکہت کی اچانک رحلت سے صرف شہر علم وادب لکھنئو اور قرب و جوار کی ہی نہیں بلکہ پورے ملک کی ادبی فضاسوگوار ہوگئی ہے۔ گذشتہ شب عیش باغ واقع قبرستان ملکہ جہاں میں ڈاکٹر نسیم نکہت کو سیکڑوں شیدائیوں، رشتے داروں اور ان سے عقیدت و محبت رکھنے والے لوگوں نے سپردِ خاک کر دیا۔

ہر دلعزیز رہنما معروف شخصیت چچا امیر حیدر نے اپنے افسردہ لہجے میں کہا کہ ڈاکٹر نسیم نکہت لکھنئو، بارہ بنکی یا اتر پردیش کی ہی نہیں بلکہ پورے ملک کی نمائندہ شاعرہ تھیں جنہوں نے پوری دنیا میں معیاری شاعری کے حوالے سے نہایت معتبر نمائندگی کی، اللہ ان کی قبر کو منور کرے اور پسماندگان کو صبر و تحمل عطا کرے۔

Mann Ki Baat: پی ایم مودی نے کس مقصد کے لیے چھوڑا تھا اپنا گھر-خاندان، من کی بات کے 100ویں ایپی سوڈ میں بتایا

وزیر داخلہ امت شاہ نے ممبئی میں سنی پی ایم مودی کے 'من کی بات' کی 100ویں ایپی سوڈ، سی ایم شندے... ڈپٹی سی ایم فڑنویس بھی رہے موجود

معروف شاعر منور رانا کے مطابق ڈاکٹر نسیم نکہت صاحب طرز شاعرہ تھیں۔ انہوں نے پوری دنیا میں شعری ادب کے حوالے سے معتبر اور قابل ستائش نمائندگی کی۔ انہوں نے ان تمام شعری قدروں اور رویوں کی ترجمانی نہایت ذمہ داری سے کی جو کسی بھی قلم کار کو ممتاز بناتے ہیں۔ معروف رائٹر پروفیسر صابرہ حبیب کہتی ہیں کہ نسیم نکہت کی بے وقت رحلت سے جو خلا پیدا ہوا ہے وہ کبھی پُر نہیں ہوسکے گا۔

چھ سے زیادہ کتابوں کی خالق ڈاکٹر نسیم نکہت نے دنیا کے اہم اور ممتاز شاعروں کے ساتھ مشاعرے کا اسٹیج بھی شئر کیا اور ساتھ ہی ادب کے منظر نامے میں اپنا مقام متعین کیا، یہی سبب ہے کہ وہ پوری دنیا کی ہر دلعزیز شاعرہ بن گئیں۔

ان کی وفات پر معروف شاعرہ ڈاکٹر شاہینہ کشور نے کینیڈا سے اپنے تعزیتی پیغام میں کہا ہے کہ ڈاکٹر نسیم نکہت ہندوستان کی ان چند شاعرات میں سے ایک تھیں جو شاعری کی دنیا میں معتبر اور با وقار تصور کی جاتی ہیں۔ انہوں نے ایک طویل عرصہ ادب کے سفر اور مشاعروں کے اسٹیج پر گزارا۔ انہوں نے ترقی پسندوں کا زمانہ بھی دیکھا تھا، جدیدیت اور مابعد جدیدیت کا پس منظر و پس منظر بھی دیکھا اور کبھی کبھی اپنے افکار کے ذریعے مابعد جدیدیت کی ترجمانی بھی کی وہ مشاعروں کی سنجیدہ اور کامیاب شاعرہ کے طور پر جانی جاتی تھیں۔ لیکن تحقیق سے بھی بڑا سروکار رکھتی تھیں۔ ڈاکٹر نسیم نکہت کے انتقال کی خبر سنتے ہی پوری ادبی دنیا سے متعدد شعراء نے تعزیت پیش کی ہے۔

ھواں دھواں
خواب دیکھنے والوں
مرا انتظار کرنا
بھیگی آنکھیں (دیوناگری)
پھولوں کا بوجھ ( دیوناگری )
اردو شاعری میں واقعہ کربلا ( تحقیقی مقالہ)

مشاعرے دیدہ و شنیدہ ( مقالہ) جیسی اہم کتابوں کی تخلیق کار کا بے وقت گزر جانا واقعی افسوسناک ہے۔

معروف سیاسی و سماجی لیڈر جناب سراج مہدی نے بھی ان کی رحلت پر افسوس کا اظہار کرتے ہوئے اسے ادب کا بڑا نقصان قرار دیا ہے۔
ڈاکٹر نسیم نکہت کے شوہر معروف مزاحیہ شاعر جناب پہلو لکھنوی (سید منور جعفری ) اور ان کے بیٹوں اور بیٹی کے پاس بھی پوری ادبی دنیا سے تعزیتی پروگرام مسلسل آرہے ہیں۔

اللہ نسیم نکہت کی قبر کو منور کرے، ان کی مغفرت فرمائے اور اہل خانہ کو صبر و تحمل عطا کرے۔ آمین

کتنی تیزی سے یہ دن رات گزر جاتے ہیں
چاہے کتنے بھی حسیں لوگ ہوں مر جاتے ہیں۔