میرے پاکستان جانے سے رشتے خراب نہیں مضبوط ہوئے ہیں: نوجوت سنگھ سدھو

پنجاب کے آرٹ، سیاحت وثقافت کے وزیر اور سابق کرکٹر نوجوت سنگھ سدھونے امید ظاہر کی ہے کہ ہندستان اور پاکستان کے حالات بہترہوں گے۔ سدھو اتوار کے روز اجمیر میں ایک نجی اسکول کے پروگرام میں شرکت کے دوران صحافیوں سے بات کررہے تھے ۔انھوں نے دونوں ملکوں کے رشتوں میں بہتری آنے کی بات کرتے ہوئے اپنے پاکستان دورے کو جائز ٹھہرایا۔

انھوں نے پاکستان کے وزیراعظم عمران خان کے ساتھ اپنے 22سالہ قدیم کرکٹ رشتوں کا ذکر کرتے ہوئے کہا،’’میں نے اس شخص کو محنت کرتے ہوئے دیکھا ہے اور دونوں ملکوں کے درمیان امن وامان اور محبت کا پیغام رشتوں میں بہتری کا راستہ نکالے گا ۔‘‘