جامعہ ملیہ اسلامیہ کے اسکولی بچوں نے پیش کی مثال، کیرالہ سیلاب زدگان کیلئے بھیجے ایک لاکھ روپئے

نئی دہلی: ملک کا ہرشخص کیرالہ سیلاب متاثرین کے لئے مدد کررہا ہے تو اسی ضمن میں جامعہ ملیہ اسلامیہ اسکولوں کے طلبا نے اپنی جیب خرچ سے  کیرالہ سیلاب زدگان کیلئے جمع کئے گئے تقریباً ایک لاکھ  روپئے کومتاثرین تک پہنچانے کے لئے کل جامعہ کے رجسٹرارکے سپرد کیا گیا۔ 

اس موقع پر رجسٹراراے پی صدیقی نے کہا کہ جامعہ ملیہ اسلامیہ کے اسٹاف اوراساتذہ کی جانب سے بھی رقم کیرالہ کے لئے بھیجی جاچکی ہے۔ تاہم بچوں کی جانب سے اٹھایا گیا یہ قدم قابل ستائش ہے۔ اس سے طلبا کے جذبے کا پتہ چلتا ہے۔

انہوں نے کہا کہ جامعہ ملیہ اسلامیہ میں طلبا کی تربیت بھی اس اندازسے کی جاتی ہے تاکہ وہ ذمہ دارشہری بنیں۔ کیرالہ کے لئے پیسے جمع کرنے کا مقصد بھی یہی ہے کہ طلبا میں مدد، ایثاروقربانی کا جذبہ پیدا ہوسکے۔ رجسٹرار کے ذریعہ یہ فنڈ وزیراعلیٰ راحت فنڈ میں جمع کی جائے گی۔