مجموعی گھریلو پیداوارپر اندازہ سے بھی زیادہ ہوگا نوٹوں کی منسوخی کا اثر: منموہن سنگھ

نئی دہلی: سابق وزیر اعظم منموہن سنگھ نے آج کہا کہ حکومت کے نوٹوں کی منسوخی کے فیصلہ کی وجہ سے مجموعی گھریلو پیداوار (جی ڈی پی) کی شرح میں کمی کا جو اندازہ لگایا گیا ہے یہ اس سے بھی کم رہے گی۔

ڈاکٹر سنگھ نے پنجاب اسمبلی انتخابات کے لئے کانگریس کا منشور جاری کرنے کے بعد نامہ نگاروں کے سوال کے جواب میں کہا کہ محکمہ شماریات نے گزشتہ ہفتے جی ڈی پی کی شرح 0.5 فیصد کم رہنے کی پیش گوئی کی ہے لیکن نوٹوں کی منسوخی کی وجہ سے معیشت کو اس سے بہت زیادہ نقصان ہوا ہے اس لئے ترقی کی شرح اس اندازے سے بھی کم رہے گی۔

انہوں نے کہا کہ مرکزی حکومت کے محکمہ شماریات نے اعداد و شمار جاری کر کے کہا ہے کہ ترقی کی شرح 7.6 فیصد سے کم ہوکر 7.1 فیصد رہے گی اور اس سے واضح ہوجاتا ہے کہ نوٹوں کی منسوخی کا جی ڈی پی پر اس سے بھی زیادہ اثر ہوگا۔