ہوم » نیوز » شمالی ہندوستان

نربھیا کے مجرمین کو کل نہیں ہوگی پھانسی، آئندہ حکم تک کریں انتظار

پیرا میڈیکل کی 23 سالہ طالبہ سے17-16 دسمبر 2012 کی درمیانی شب کو 6 لوگوں نے چلتی بس میں اجتماعی آبروریزی کی تھی اور اسے سڑک پر پھینک دیا تھا۔ اسے علاج کے لئے سنگا پور لے جایا گیا تھا، جہاں 29 دسمبر کو اس کی موت ہوگئی تھی۔

  • Share this:
نربھیا کے مجرمین کو کل نہیں ہوگی پھانسی، آئندہ حکم تک کریں انتظار
نربھیا آبروریزی معاملے کے چاروں مجرمین کی پھانسی پر فوری روک۔

نئی دہلی: نربھیا اجتماعی آبروریزی اور قتل کے مجرمین کو پھانسی پرلٹکانےکی طےتاریخ ایک بار پھرملتوی ہوگئی ہے۔ پٹیالہ ہاؤس کورٹ نے جمعہ کو آئندہ حکم تک پھانسی پر روک لگا دی ہے۔ اب ان مجرمین کو یکم فروری کو پھانسی نہیں دی جائےگی۔ یہ دوسری بار ہےجب مجرمین کی پھانسی ملتوی کردی گئی ہے۔ اس سےپہلے 22 جنوری کی صبح 7 بجے مجرمین کو پھانسی دینےکی تاریخ طے ہوئی تھی۔ واضح رہےکہ مجرمین کی طرف سے جمعرات کو عدالت میں عرضی داخل کرکے صدر جمہوریہ کے پاس رحم کی درخواست زیر التوا ہونےکو بنیاد بنا کرپھانسی پر روک لگانےکا مطالبہ کیا گیا ہے۔ جسٹس دھرمیندر رانا نے تہاڑ جیل انتظامیہ کو آرڈرکی کاپی حاصل کرنےکا حکم دیا ہے۔ عدالت نےکہا کہ اگلے حکم تک پھانسی پر روک لگائی جائے۔


نربھیا کے وکیل نے دی تھی یہ دلیل


وہیں سماعت کے دوران تہاڑ جیل کے وکیل نےکہا کہ ونے کمار شرما انتظار کرسکتا ہے، لیکن باقی تین مجرم کو کل پھانسی دی جائے۔ تہاڑ جیل کے وکیل نےکہا کہ جس مجرم کی رحم کی درخواست صدر جمہوریہ کے پاس زیر التوا ہے، اسے چھوڑ کر باقی تین کو کل یعنی یکم فروری کو پھانسی دی جائے۔ تہاڑ جیل کی طرف سے پیش ہوئے وکیل عرفان احمد نےکہا کہ صرف ایک مجرم (ونے شرما) کی رحم کی درخواست زیر التوا ہے اور دیگرکو پھانسی دی جاسکتی ہے۔ انہوں نےکہا کہ اس میں کچھ غیر قانونی نہیں ہے۔ نربھیا کے وکیل نے عدالت میں کہا کہ ضابطہ کہتا ہےکہ جیل انتظامیہ اس سے متعلق حکومت کو میسیج بھیج کر دریافت کرےگی کہ کیا پھانسی روکی جائے۔ اگر کوئی جواب نہیں ملتا تو پھانسی کو روکا جاسکتا ہے۔ اس کےلئے عدالت کے حکم کی ضرورت نہیں ہے۔


نربھیا کیس کے چاروں مجرمین

کچھ مجرمین نے نہیں اٹھائے قانونی اقدامات

واضح رہےکہ مجرم پون گپتا، ونےکمار شرما اور اکشے کمارکے وکیل اے پی سنگھ نے عدالت سے پھانسی پر'غیر معینہ مدت کےلئے' روک لگانےکا مطالبہ کیا۔ انہوں نےکہا کہ مجرمین میں سےکچھ کے ذریعہ قانونی اقدامات کا استعمال کیا جانا باقی ہے۔ نچلی عدالت نے17 جنوری کو معاملےکے چاروں قصورواروں مکیش (32)، پون گپتا (25)، ونے کمار شرما اور اکشے کمار (31) کو موت کی سزا دینے کے لئے دوسری بار بلیک وارنٹ جاری کیا تھا، جس میں یکم فروری کو صبح 6 بجے تہاڑ جیل میں انہیں پھانسی دینےکا حکم دیا گیا۔ اس سے پہلے7 جنوری کو عدالت نے پھانسی کےلئے22 جنوری کی تاریخ طےکی تھی۔
First published: Jan 31, 2020 09:20 PM IST