آخر کار مرکزی حکومت نے نوجوت سنگھ سدھو کو کرتار پور جانے کی دی اجازت ، سدھو نے کہی تھی یہ بات

کانگریس کے لیڈر اور سابق وزیر نوجوت سنگھ سدھو کو حکومت نے جمعرات کو کرتارپور صاحب کوریڈور کے افتتاحی پروگرام میں شامل ہونے اور گردوارہ کے درشن کی مشرو ط اجازت دے دی۔ ذرائع نے بتایا کہ کانگریس کے لیڈر، رکن اسمبلی اورسابق وزیر نوجوت سنگھ سدھو کو 9 نومبر کو کرتارپور صاحب جانے کی سیاسی منظوری مل گئی ہے ، لیکن یہ منظوری مشروط ہے۔

وہ افتتاح کے موقع پر جانے والے پہلے جتھہ میں شامل ہوں گے ، جس میں سابق وزیراعظم منموہن سنگھ اور پنجاب کے وزیراعلی کیپٹن امریندر سنگھ بھی جائیں گے۔ کرکٹ کی دنیا سے سیاست میں قدم رکھنے والے سدھو نے وزیر خارجہ سبرامنیم جے شنکر کو آج دن میں بھیجے اپنے تیسرے خط میں لکھا تھا کہ قانون پر عمل کرنے والے شہری کے طورپر مرکزی حکومت اجازت ملنے پر ہی پاکستان جانے کے خواہش مند ہیں۔

Sources: Political clearance has been granted to Congress leader Navjot Singh Sidhu to travel through the Kartarpur Sahib Corridor on 9th November. pic.twitter.com/vVfQexF5hz

— ANI (@ANI) November 7, 2019

انہوں نے اپنے خط میں مزید کہا تھا کہ اگر حکومت کو کسی طرح کا اعتراض ہے اور انہیں منع کردیتی ہے ، تو قانون پر عمل کرنے والے شہری کے طورپر وہ نہیں جائیں گے۔ اگر ان کے تیسرے خط کا جواب نہیں دیا گیا تو وہ لاکھوں سکھ عقیدت مندوں کی طرح ویزا لے کر پاکستان کے لئے روانہ ہوں گے۔

اس سے پہلے شام کو وزارت خارجہ کے ترجمان رویش کمار نے باقاعدہ بریفنگ کے دوران سدھو کو سیاسی منظوری دیئے جانے سے متعلق سوالات کا واضح جواب نہیں دیا تھا۔ انہوں نے کہاتھا کہ نوجوت سنگھ سدھو کیا کرنا چاہتے ہیں، یہ ان پر منحصر ہے۔ کرتارپور کوریڈور کا موضوع بہت بڑا ہے ، اس لئے ہم افراد کے مسئلوں پر توجہ مرکوز نہیں کرسکتے ہیں۔