بجنور میں صورتحال پرامن مگر کشیدہ ، مقتولین سپرد خاک ، دو پولیس اہلکار معطل

بجنور : اترپردیش میں بجنور کے شہر کوتوالی علاقہ کے پیدہ گاؤں میں ہوئے فرقہ وارانہ فساد کے بعد آج صورتحال پرامن مگر کشیدہ ہے ۔ چھیڑ چھاڑ کے معاملہ پر ہوئے جھگڑے میں کل 4 افراد ہلاک اور 12 سے زیادہ زخمی ہوگئے تھے۔ پولیس کے مطابق چاروں لاشوں کو آج صبح سپرد خاک کردیا گیا۔ اس معاملہ میں چھ افراد کو گرفتار کرلیا گیا ہے اور دو پولیس والوں کو معطل کردیا گیا ہے۔
قابل ذکر ہے کہ شہر کوتوالی علاقہ کے پیدہ گاؤں میں چھیڑچھاڑ کے واقعہ کے بعد ہوئے جھگڑے اور فائرنگ میں چار افراد ہلاک اور 12 سے زیادہ زخمی ہوگئے تھے۔مرنے والے ایک ہی کنبہ کے ہیں۔
دریں اثنا مشتعل افراد نے قتل کے احتجاج میں کئی جگہ پتھراؤ آتشزنی اور توڑ پھوڑ کی اور ایک موٹر سائیکل اور کچھ جھوپڑیوں کو آگ لگادی جس سے علاقہ میں کشیدگی پیدا ہوگئی۔