مسلم تنظیمیں مسلم پرسنل لا میں غیرمذہبی اداروں اورعدالتوں کی مداخلت کے خلاف

نئی دہلی۔ بھارتیہ مسلم مہیلا آندولن کی ذکیہ سون اورنورجہاں صفیہ نیاز کی جانب سے ایک بار پھر سپریم کورٹ میں عرضی داخل کرکےتین طلاق کےغیرشرعی ہونے کا دعوی کیا گیا ہے۔ عرضی میں طلاق بدعت اورحلالہ سے مسلم خواتین کےساتھ نا انصافی ہونے کا بھی ذکر ہے۔ جب کہ دوسری جانب تمام مسالک کے علما  مسلم پرسنل لا میں کسی بھی طرح کی مداخلت کو ناقابل برداشت مانتے ہیں۔

تمام مسالک کے علما و دانشوران کا ماننا ہے کہ تین طلاق کو ختم کرنے کی مانگ دراصل چند مسلم خواتین کی جانب سے کی  جارہی ہے جو کہ آر ایس ایس کے بہکاوے میں آکر اس طرح کی مانگیں کررہی ہیں۔ ان کا کہنا ہے کہ اگر انہیں اسلامی شریعت پسند نہیں تو وہ قاضی کے بجائےعدلیہ کا رخ کرنےکے لئےآزاد ہیں۔

جماعت اسلامی ہند خواتین ونگ کی آرگنائزر شائستہ رفعت اسلامی شریعت میں اسلامک اسکالر کی مداخلت کو تو جائز ٹھہراتی ہوئی نظر آتی ہیں لیکن غیرمذہبی اورغیرشرعی ادارہ اوراشخاص یہاں تک کہ عدالت کی مداخلت کو بھی غلط قراردیتی ہیں۔  انہوں نے کہا کہ اسلام میں جائزچیزوں میں سب سے زیادہ مکروہ طلاق ہے اورطلاق بدعت اس سےبھی کئی گنا زیادہ مکروہ ہے۔

انہوں نے کہا کہ لہذا مردوں پر ذمہ داری عائد ہوتی ہے کہ وہ طلاق کی نوعیت کو سمجھیں لیکن اگرکوئی طلاق بدعت کوسمجھےبغیرطلاق دے دیتا ہے توطلاق واقع ہوجائےگا۔ شائستہ رفعت نےکہا کہ حلالہ اسلامی شریعہ کاحصہ ہے اس میں کسی بھی طرح کی تبدیلی نا ممکن ہے۔

اس بارے میں مرکزی جمعیت اہل حدیث، ہند کے ناظم عمومی مولانا اصغرعلی امام مہدی نے کہا کہ اہل حدیث کے نزدیک ایک نشست میں تین طلاق کو صرف ایک طلاق تسلیم کیا جاتا ہے تاہم انہوں نے کہا کہ غیرمذہبی افراد کومذہبی امورمیں مداخلت سے بچنا چاہئے۔ انہوں نےکہا کہ مسلم پرسنل لا بورڈ میں کسی بھی طرح کی مداخلت غیرفطری ہوگی۔

آل انڈیا مسلم پرسنل لا بورڈ کے سینئر رکن ڈاکٹر قاسم رسول الیاس کا بھی یہی کہنا ہے کہ بورڈ سپریم کورٹ میں فریق ہےاور آئندہ بھی مسلم پرسنل لا کے حوالےسے کسی بھی معاملہ میں فریق ہوگا۔

انہوں نے کہا کہ طلاق بدعت کو صرف ایک طلاق ماننے والوں کے بھی اپنےشرعی دلائل ہیں۔ جو جس مسلک کا ہے، وہ اس پرعمل کرتےہیں۔  لیکن شرعی مسئلہ میں غیرمذہبی یا پھرغیرشرعی فیصلہ ناقابل برداشت اور ناقابل قبول ہے۔