Padma Awards: پدم ایوارڈز کا اعلان، ملائم سنگھ یادو کو ملا بعد از مرگ پدم وبھوشن ایوارڈ

نئی دہلی : 74 ویں یوم جمہوریہ کے موقع پر پدم ایوارڈز کے ناموں کا اعلان کردیا گیا ہے۔ اس سال اس 106 مشہور شخصیات کو ایوارڈ دیا جائے گا ، جس میں 6 لوگوں کو پدم وبھوشن، 9 کو پدم بھوشن اور 91 لوگوں کو پدم شری ایوارڈ سے نوازا جائے گا۔ مغربی بنگال کے ڈاکٹر دلیپ مہالانبس کو بعد از مرگ پدم وبھوشن سے نوازا گیا ہے، جو ہندوستان کا دوسرا سب سے بڑا اعزاز ہے ۔ انہیں او آر ایس کی دریافت کیلئے اعزاز سے نوازا گیا ہے۔ سرکاری ریلیز کے مطابق مغربی بنگال سے تعلق رکھنے والے ڈاکٹر مہالانبس نے او آر ایس کے وسیع پیمانے پر استعمال کا بیڑا اٹھایا ۔ ایسا اندازہ ہے کہ اس سے عالمی سطح پر 50 ملین سے زیادہ جانیں بچائی گئی ہیں۔ ڈاکٹر مہالانبس کا گزشتہ اکتوبر میں کولکاتہ میں انتقال ہوگیا تھا ۔

نیز طبلہ استاد ذاکر حسین، ایس ایم کرشنا اور سرینواس وردھن کو بھی پدم وبھوشن دیا جائے گا۔ دلیپ مہالانبس کے علاوہ ملائم سنگھ یادو اور بال کرشن دوشی کو بعد از مرگ پدم وبھوشن سے نوازا جائے گا۔ وہیں ایس ایل بھیرپا، کمار منگلم برلا، دیپک دھر، وانی جے رام، سوامی چنا جیر، سمن کلیان پور، کپل کپور، سودھا مورتی اور کملیش ڈی پٹیل کو پدم بھوشن سے نوازا جائے گا۔

ڈاکٹر سوکاما آچاریہ، جودھیا بائی بیگا، پریمجت بیریا، اوشا برلے، منیشور چند ڈاور، ہیمنت چوہان، بھانو بھائی چتارا، ہیموپووا چوٹیا، نریندر چندر دیببرما (بعد از مرگ)، سبھدرا دیوی، کھدر والی دودیکولا، ہیم چندر گوسوامی، پریتیکانا گوسوامی، اور رادھا چرن گپتا سمیت دیگر کو پدم شری سے نوازا گیا ہے۔

یہ بھی پڑھئے: 26 جنوری پر ممبئی میں ہوائی حملے کا اندیشہ! پولیس نے شیواجی پارک کو نو فلائی زون قرار دیا

 

یہ بھی پڑھئے: اتر پردیش اردو اکادمی کی جانب سے 2019 اور 2021 کے انعامات کا اعلان، جانئے کن کن کو ملا

خیال رہے کہ پدم ایوارڈز - پدم وبھوشن، پدم بھوشن اور پدم شری ملک کے اعلیٰ ترین شہری اعزازات میں سے ہیں۔ 1954 سے ان ایوارڈز کا اعلان ہر سال یوم جمہوریہ کے موقع پر کیا جاتا ہے۔ یہ اعزازات فن، ادب اور تعلیم، کھیل، طب اور سماجی کام کے شعبوں کے کئی گمنام ہیروز کو دئے جاتے ہیں ۔