'کچھ لوگوں کی تقریر پر حامی اچھل رہے تھے....' پارلیمنٹ میں وزیراعظم مودی کا کانگریس پر جوابی حملہ

نئی دہلی : وزیر اعظم نریندر مودی نے بدھ کو لوک سبھا میں صدر دروپدی مرمو کے خطاب پر شکریہ کی تحریک پر بحث کا جواب دیا۔ اس دوران وزیراعظم مودی نے راہل گاندھی سمیت اپوزیشن پر بھی جوابی حملہ کیا۔ انہوں نے کہا کہ یہاں بحث میں سبھی نے اپنے اپنے اعداد و شمار اور دلائل دئے۔ اپنی دلچسپی، رجحان اور فطرت کے مطابق اپنی بات رکھی۔ جب ہم ان باتوں کو سمجھنے کی کوشش کرتے ہیں تو ہمارے ذہن میں یہ بھی آتا ہے کہ کس کی کتنی صلاحیت، قابلیت اور ارادہ ہے۔ ملک ان سبھی کا جائزہ لیتا ہے ۔

وزیراعظم مودی نے کہا کہ ایوان میں ہر کسی کو اپنی دلچسپی اور جھکاؤ کے مطابق رائے پیش کرنی چاہئے۔ اس کو سننے پر معلوم ہوتا ہے کہ کس کو کتنی سمجھ ہے اور کس کا کیا ارادہ ہے۔ وزیراعظم مودی نے کہا کہ مجھے صدر کے خطاب پر شکریہ ادا کرنے کا موقع ملا ہے۔ اس مرتبہ میں شکریہ کے ساتھ صدر جمہوریہ کو بھی مبارکباد دینا چاہتا ہوں۔ اپنی بصیرت انگیز تقریر میں صدر نے ہم سب اور کروڑوں ہم وطنوں کی رہنمائی کی ہے۔

راہل گاندھی پر نشانہ سادھتے ہوئے وزیر اعظم نریندر مودی نے کہا کہ کل کچھ لوگوں کی تقریر کے بعد ان کے حامی اچھل رہے تھے۔ پورا ایکو سسٹم اچھل رہا تھا۔ ایسے لوگوں کے لئے کہا گیا ہے کہ 'یہ کہہ کہہ کر ہم دل کو بہلا رہے ہیں، وہ اب چل چکے ہیں ، وہ اب آرہے ہیں '۔ انہوں نے کہا کہ ایک بڑے لیڈر، صدر جمہوریہ کی توہین بھی کررہے تھے ۔ ہمارے قبائلی سماج کیلئے ان کی سوچ کیا ہے، ان کے اندر نفرت کا احساس اب کھل کر سامنے آ گیا ہے ۔

وزیراعظم نریندر مودی نے بھی صدر کے خطاب کے کچھ جملوں کا حوالہ دیا اور یہ بھی کہا کہ صدر کے خطاب پر کسی کو کوئی اعتراض نہیں ہے۔ اس پر کسی نے تنقید تک نہیں کی۔ انہوں نے کہا کہ مجھے خوشی ہے کہ کسی نے مخالفت نہیں کی، سب نے قبول کیا۔

یہ بھی پڑھئے: آر بی آئی نے 0.25 فیصد قرض کیا مہنگا، اگلے سال شرح نمو 6.4 فیصد رہنے کا تخمینہ

یہ بھی پڑھئے: اروند کیجریوال نے این ڈی ایم سی ملازمین کو مستقل کرنے کیلئے وزیر داخلہ کو لکھا خط

وزیراعظم نے کہا کہ اسے پورے ایوان کی منظوری ملی ہے۔ اراکین نے اپنی سوچ کے مطابق اپنی بات رکھی۔ اس سے ان کی فہم اور ارادے کا بھی پتہ چلا ۔