Punjab Election: نوجوت سنگھ سدھو کے قریبی کے ہیٹ اسپیچ والا ویڈیو وائرل، کہا- ’میں قوم کے لئے گھر میں گھس کے ماروں گا‘

نئی دہلی: پنجاب الیکشن (Punjab Election) کی تاریخ جیسے جیسے نزدیک آرہی ہے، ویسے ویسے ریاست میں انتخابی تپش بھی بڑھتی جا رہی ہے۔ اسمبلی انتخابات سے قبل پنجاب کانگریس کے صدر نوجوت سنگھ سدھو کے اہم معاون اور ریٹائرڈ ڈی جی پی محمد مصطفیٰ نے مبینہ طور پر نازیبا الفاظ  کا استعمال کیا ہے، جس کے بعد سردی کے موسم میں بھی انتخابی گرماہٹ بڑھتی ہوئی نظر آرہی ہے۔ سابق ڈی جی پی کے ویڈیو نے ملک کی سب سے پرانی پارٹی کو بے حد پریشانی میں ڈال دیا ہے۔

مبینہ ویڈیو میں سابق ڈی جی پی محمد مصطفیٰ اپنی بیوی اور مالیرکوٹلہ سے کانگریس کے امیدوار اور کابینہ وزیر رضیہ سلطانہ کے لئے انتخابی تشہیر کر رہے تھے۔ اس دوران ان پر اشتعال انگیز تقریر کرنے اور اپنے خطاب میں نازیبا الفاظ کا استعمال کرنے کا الزام لگا۔

محمد مصطفیٰ 20 جنوری کو ایک عوامی جلسے کو خطاب کر رہے تھے۔ الزام ہے کہ اس دوران انہوں نے کہا کہ اگر ان کے پروگرام کے پاس کسی اور کے پروگرام کو اجازت دی گئی تو اس کے سنگین نتائج بھگتنے ہوں گے۔ دراصل محمد مصطفیٰ جہاں تقریر کر رہے تھے وہیں ایک دوسری سیاسی پارٹی کا پروگرام تھا اور اس میں لوگوں کی بھیڑ دیکھ کر محمد مصطفیٰ آگ بگولہ ہوگئے۔ انہوں نے کہا کہ میں ان کا کوئی جلسہ نہیں ہونے دوں گا، میں ایک قومی سپاہی ہوں، میں آرایس ایس کا ایجنٹ نہیں ہوں، جو ڈر کر گھر میں گھس جاوں گا۔

 

@sambitswaraj, DON'T LOOK 4 YOUR STAPLE DIET "HINDU-MUSALMAN" INTO EVERYTHING. UNLESS YOUR EARDRUMS LIE DYSFUNCTIONAL, STRETCH YOUR EARS TO LISTEN "FITNON", NOT "HINDUON". "फितने और फ़ितनों " MEANING MISCHIEVOUS ELEMENTS, ARE THE MOST COMMONLY USED EXPRESSIONS IN MY SAMAJ. 1\N pic.twitter.com/uqu5mmCzmZ

— MOHD MUSTAFA, FORMER IPS (@MohdMustafaips) January 22, 2022

محمد مصطفیٰ نے سیاسی پارٹی اور ضلع انتظامیہ کو دھمکی دیتے ہوئے کہا کہ انتظامیہ اور یہ لوگ میری بات کو اچھی طرح سے سمجھ لیں، اگر میں بگڑ گیا تو کسی کے بھی قابو میں نہیں آوں گا۔ انہوں نے انتظامیہ کو وارننگ دی کہ جہاں بھی ان کا پروگرام ہے، وہاں مخالف جماعتوں کے پروگرام کو اجازت نہیں ملنی چاہئے۔ انہوں نے کہا کہ اگر دوبارہ ایسی حرکت ہوئی تو خدا قسم گھر میں گھس کے ماروں گا، میں قوم کے لئے لڑ رہا ہوں، ووٹ کے لئے نہیں لڑ رہا ہوں۔

مبینہ نازیبا الفاظ والا یہ ویڈیو سب سے پہلے مبینہ طور پر بی جے پی پنجاب یوتھ ونگ کے ترجمان چرانشو رتن کے ذریعہ شیئر کیا گیا۔ اسے ویڈیو پر ردعمل ظاہر کرتے ہوئے بی جے پی ترجمان شاذیہ علمی نے کہا کہ ہماری ٹیم اور چرانشو کو یہ ویڈیو ملا ہے۔ انہوں نے کہا کہ محمد مصطفیٰ کے ذریعہ اس طرح کا اشتعال انگیز بیان مسلم اکثریتی حلقہ مالیر کوٹلہ میں انتخابی تشہیر کے دوران دیا گیا۔ انہوں نے الزام لگایا کہ محمد مصطفیٰ الیکشن سے قبل اس طرح کے الفاظ کا استعمال کرکے فرقہ وارانہ ماحول کو خراب کرنے کی کوشش کر رہے ہیں۔

بی جے پی ترجمان نے پنجاب کانگریس صدر نوجوت سنگھ سدھو سے کہا کہ انہیں اس بارے میں جواب دینا چاہئے اور اس معاملے پر اپنا رخ واضح کرنا چاہئے۔ اتنا ہی نہیں انہوں نے محمد مصطفیٰ کے اس بیان پر الیکشن کمیشن کو نوٹس میں لینے کی بات کہی ہے۔ انہوں نے کہا کہ الیکشن کمیشن کو یہ یقینی بنانا چاہئے کہ محمد مصطفیٰ کی اہلیہ اور رکن اسمبلی رضیہ سلطانہ کو وہاں سے الیکشن نہیں لڑنے دیا جائے۔

عام آدمی پارٹی کے سینئر لیڈر اور پنجاب معاملوں کے انچارج راگھو چڈھا نے بھی تبصرہ کیا اور کہا کہ یہ واضح ہے کہ کانگریس الیکشن سے قبل پنجاب میں امن وامان کی صورتحال کو خراب کرنا چاہتی ہے‘۔ ایک سابق ڈی جی پی اور پی سی سی سربراہ کے مشیر اور چنی حکومت کے قریبی، یہ واضح ہے کہ پارٹی امن وامان کے ماحول کو خراب کرنا چاہتی ہے۔ پارٹی کو یہ واضح کرنا چاہئے کہ کیا وہ ان بیانات کی حمایت کرتے ہیں اور کیا وہ اپنے مشیروں کے ذریعہ اپنے نظریہ کو عام کر رہے ہیں‘۔